No.4097/2021-2022

Aizawl, the 24th February 2022 : Home Minister Pu Lalchamliana’n vawiin khan Directorate of Forensic Science Laboratory, MINECO ah Cyber Crime hnuhma chhuina tur Cyber Forensic Laboratory bun thar a hawng.

Home Minister Pu Lalchamliana chuan tunlai khawvel thangchho mekah technology in nasa taka hma sawnin thiamna leh hmanrua te chu a changkan tawh thu sawiin heng te hi kan khawsak ti nuamtu leh puitu tangkaina tam tak nei an nih rualin a diklo zawnga hmang leh pawikhawihna atan hmang thin an awm chho ta niin a sawi a. Cyber crime avang hian mi tamtakin an pawisa khawl sa te an hloh a, an thlalak leh mimal nun te phawrh mualphoa awmin an data pawimawh tam tak misual kutah te a lut thin tiin a sawi a. Tunhnaiah Cyber Crime kaihhnawih pawikhawihna Mizoramah  a hluar nia hmuh a nih thusawiin kum 2020 hnua lamah ringawt pawh Police station an case 700 chuang an ziahluh a ni, a ti.

Pu Lalchamliana chuan Cyber Forensic Laboratory hawn a ni chu lawmawm tiin Cyber Forensic Laboratory kan neih thar ah hian Cyber Crime chungchanga hnu chhuinaah nasa takin min pui thei dawn niin a lang a. Mobile phone leh computer atanga thil pawimawh (data) lak chhuah te, delete/erase tawh lak chhuah leh storage device chhe tawh atanga thil pawimawh lak chhuah te a theih dawn a. Hnuchhuinaah finfiahna (evidence) neih theihna kawngah nasa takin a tangkai dawn a ni, a ti. Cyber Crime chungchangah mitin hi fimkhur a tul a, hotea an ngaih thil te hian kan rohlu te, kan zahawmna te, kan himna te a ti boin a ti chhe thei tih hi hriain heng technology kan hman danah te hian fimkhur a tul hle a ni, a ti.

Cyber Forensic Laboratory hawnna inkhawm tawite hi Home Secretary Pu Vanlalngaihsaka’n kaihruaiin Cyber Crime hi mitin chunga thleng thei a nih avangin hemi chungchanga hriat leh inzirtir chu thil pawimawh tak a ni, a ti. He hunah hian Forensic Science Laboratory Director Pu H. Sangchungnunga chuan FSL chanchin te, an hnathawh dan leh FSL naupangte ni chunga ram pum huap pawh FSL rinkai leh hmantlak tak an nih dante a sawi a. Programme ah hian DGP Pu Devesh Chandra Shrivastava leh a thawpui IGP te, Home Department officer te leh District & Sessions Judge te an tel a ni.

Cyber Forensic Laboratory hi Sawrkar Laipuiin hmeichhiate an him zawkna tura a hmalakna lian tak Nirbhaya Fund Scheme hmanga din a ni a. India rama state 10 Pilot Project atana a thlan zinga Mizoram FSL pawh telin Nirbhaya Fund atanga cheng nuai 419 an dawng a. He fund hi cyber forensic laboratory din na atan leh \DN|A division tihchangtlun nan hman a ni. He Lab ah hian mobile phone leh computer atanga data lakchhuah a enfiah te, data nawhreh tawh leh hard disk chhia atang pawha evidence pawimawh tak tak lak let te, cryptocurrency hmanga pawisa inthawn dan chhuite, pawikhawihna hmunah eng cell tower te nge awm tih hriat theih te bakah email chhui te an ti thei dawn a ni.

Mizoram Forensic Science Laboratory hi kum 1998 a din niin 2015 khan Directorate ah hlankai a ni a. Director tiamin Forensic Expert 15 an awm mek a. Division changtlang tak 7 an nei tawh a, Cyber Forensic Laboratory hi Division 8-na a ni dawn a. 2021 chung khan pawikhawihna hmun 52 enfiahin, Case 890 leh Exhibit 6885 an endik a, heng an Case te hi Court-ah an dinpui thin bawk a ni.