No.4098/2021-2022

Aizawl the 24th February, 2022: World Health Organisation (WHO) leh European Union Humanitarian Aid chuan Covid-19 hri pui leng dona kawnga hmanraw pawimawh tak RT-PCR test kit 2,16,864 Mizoram tan an hlan a, vawiin chawhnu khan Health Minister Dr R. Lalthangliana’n Zoram mipuite aiawhin a pisa ah a dawng a, WHO aiawhin Dr.Lalhlimpuii, Surveilance Medical Officer, World Health Organisation chuan a hlan a ni.

WHO leh European Union Humanitarian Aid tangkawpin vawiina RT-PCR test kit an hlan hi BGI Health Company, Hong Kong siam a ni a. US Dollar 1,87,200 man niin, tunlaia India tangka hlutna nena chhut chuan cheng nuai 142 chuang hu a ni. RT-PCR test kit hi Hong Kong atanga thlawhtheihnain Kolkata rawn thlen a ni a, Kolkata atang hian Truck lianin Mizoram thleng rawn phurin nizan zanlai khan an rawn thlen a ni.

He hunah hian Health Minister Dr R. Lalthangliana chuan World Health Organisation leh European Union Humanitarian Aid chungah lawmthu sawiin khawvel puma mipuite hriselna leh himna kawnga an hmalakna zel turah duhsakna a hlan a, COVID-19 hri leng karah WHO hian Mizoram tan Oxygen Concentrator engemawzat Mizoram tan an hlan tawh a, nikuma hri kai kan pun nasat vanglai khan kan mamawh hmanrua chi hrang hrang RAgT kit 3,60,000, Multipurpose Tent 12, Arterial blood gas analyser 10, Oxygen Concentrator 194 min pe in tunah RT-PCR test kit 2,16,864 lai kann han dawng leh a, PPE kit 5000 dawn tur kan la nei bawk a, hetianga a thlawn liau liau a min rawn pe hi thinglung takin lawmthu ka sawi a, Zoram mipuite aiawhin lawm takin ka dawng a ni, a ti.

Minister hian COVID-19 dona kawnga theihtawp chhuahtu MKHC, Jt. NGO Coordination Committee, ACLCA, VC Association, LLTF/VLTF, IMA, MOT, MGDA, NGHAM, Volunteers, Hrontline Workers, Sawrkar officialte, mimal, chhungkua leh pawlho hrang hrangte chungah lawmthu a sawi bawk a ni.

Dr.Lalhlimpuii, Surveilance Medical Officer, World Health Organisation chuan WHO in State bil tan COVID-19 sample test kit hi a lei ngai lova, Health Ministerin theihtawp chhuaha hma a lakna an hriatin an ngai pawimawh em em a, India ram level-ah a tihfel theih loh avangin WHO, South-East Asian Region Office-ah tih a ngai a, RT-PCR test kit hi temperature uluk taka control na hnuaiah thawn a ngaih avangin beisei aiin hun duh rei deuh hlek a ni, a ti.