Vawiin chawhma dar 10:30AM khan DVO Office kawtah AH&VETY Department, Siaha District chuan Ar Vulh thlangtu mi 181 hnenah NLUP tanpuina a sem. Vawiin Poultry trade thlangtute hnena NLUP tanpuina sem hi, NLUP 2nd Phase-a 3rd Installment niin, Ar note 50 leh a chaw leina tur tangka faiin Rs.20,000/- theuh beneficiaries te hnenah pek an ni. Vawiin an sem bak zawng hi beneficiaries thingtlang khaw hla deuh a awmte hnenah September thla-a sem chhunzawm zel tura ruahmanna siam a ni.

Vawiin NLUP semna hun hmanpuitu Pu R.Zarzosanga, Deputy Commissioner, Siaha District chuan thu sawiin, Siaha District hi Arsa leh Artuiah kan intodelh lo hle a, vawiin NLUP tanpuina dawngtu ten in pawisa dawn a hmanna tur dik taka in hman phawt chuan reilo te-ah Siaha District chuan Arsa leh Artuiah kan intodelh thuai dawn a ni, a ti. Trade dangte ang lovin Poultry trade-ah chuan beneficiaries ten rinawmna leh tihtakna nena in thawh phawt chuan a rah pawh in seng hma dawn a ni, a ti bawk.