Vawiin chawhma dar 10:00Am khan District Industries Centre Hall-ah kum 2017-2018 chhunga Siaha District a Health Worker te hnathawh thlir letna leh Training na hun hman a ni.

Vawiin Health Worker te training na-ah hian Dr. Lalnunpari, Chief Medical Officer, Siaha District chuan thu sawiin, Siaha District hi a tha lamah engkima a hmasa ber kan nih tur a ni, a ti a. Health Worker hi eizawnna-ah chauh ngai lova, Missionary hnathawk ang a ngai theuh turin kal khawmte chu a chah hlawm a ni. Mi harsate tanpui thei tura Pathian in a min siam leh mi nunna hlu tak chhan thei tura min duan tluka ropui hi a awm lo a ni tiin, hetiang tih theih tur chuan kan hna-a kan tui hle a ngai a, kan hnathawh chhan pawh kan hriatchian hle a ngai a ni, a ti bawk. 

Pi Mary Vanlalpeki, DPM, National Health Mission chuan Nu thina chungchang (Maternal Death Review) leh Naupang thina chungchang (Child Death Review) a hriattur pawimawh leh hmalak dan tur hrang hrangte zirtirna pehin. Pu Zaitinvawra Hmar, Consultant, NTCP, Siaha chuan Hmeichhe naupai lai leh Nu nau enkawl laite tana Zuk leh Hmuam (Vaihlo) that lohna leh nghawng a neih dante chipchiar takin zirtirna  a peh bawk a ni.

Vawiin Health Worker training na-ah hian Dr. R. Lalsanglura, MO, Tipa PHC, Dr. Joseph Dena, MO, Phura PHC, Dr. Lalchhuanliana, MO, Chhaolo PHC leh Dr. F. Zothangliana, MO, Chakhei PHC te chuan an telpui a ni.