Nimin khan Health Department chuan Kerala State a leng mek Nipah Virus chungchangah thu chhuah siamin, Dr. Pachuau Lalmalsawma, State Nodal Officer, IDSP chuan India ramchhunga Nipah Virus dinhmun a sawifiah a, Nipah Virus Infection (NiV) natna in Kerala state ramri a la pel lo a, Mizoramah lo chi-aina chhan tur a awm rih lo, a ti.

Kerala state a district pahnih, Malappauran leh Kozhikkode a Nipah Virus natna vei 16 zinga 13 (81%) in an thíhpui avangin India ram hmun hrang hrangah boruak a ral khel hle chungin he natna (NiV) hi state dangah hmuh chhuah a la ni rih loh avangin Mizoram mipuite tan chi-aina chhan tur a awm lo rih lo a ni. Nipah Virus natna chung chang mipui zirtir ruala a tul anga Sorkar Laipui nen hmalak mek zel a ni.

Nipah Virus natna (NiV) hi ran leh ramsa lama atanga virus lo irh chhuak , kum 1988-a Malaysia rama hmuhchhuah hmasak leh an hmuhchhuahna khaw hming (Kampung Sungai Nipah) rawn pu chho ta a ni. Bak chi khat, Pteopus (genus), thei lam tlan thinin he virus hi nat pui lem lovin an pu darh thin. He virus hrik pai an nih loh chuan bak na zawng erawh a hlauhawm lo.

India leh Bangladesh a NiV hri len chhan ber ni a lang chu thei leh thei sawngbawlin a tlantu bak (Fruit bat) chil (saliva) emaw, zun emaw a kai ei atangin a ni ber a ngaih a ni. NiV natna hrik pai bak (Fruit bat)in an ei hnu theirah ei atanga kai a nih rualin he natna vei ran atanga kai chhawn leh theih niin a lang a; he natna vei (mihring) damlovin mi dangah a kai chhawng thei bawk a ni.

 NiV natna hi chi hrang hranga lang chhuak theiin - hritlang, khawsik, khuh, thawk harsa, lu na, luak, kaih, ngaihtuahna buai leh vai, chauh ngawih ngawih, tihrawl na leh kawthalo thlengin a awm thei a ni.

He natna hi thihpui mai theih a nih avangin a hri lenna hmunah chuan invenna lama uluk taka hma lak tur a ni. Thei rah fai tha taka sil loh chu ei mai mai loh tur a ni a, bak leh ramsa ei hnu phei chu ei loh a him. Bak zun, chill eh ek atangin vawkin an lo kai ve theih a vangin NiV natna len lai chuan vawk vulhtute pawhin ran vulte hnai taka awmin khawi mai mail oh tur a ni. Mahni inenkawl faia, kut leh taksa dangte pawh fai taka sil fo tur a ni. A lenna hmunah te chuan fimkhur thu hlaah hmai khuhna (mask) vuah a tha. He natna vei ni a rinhlelhte chu fimkhurna tur tul anga hma la chungin damdawiinah hruai tur a ni.

A chunga tarlante khi NiV natna lenna hmuna hma lak dantur leh nih phung tlangpui a ni a, tun dinhmunah hian Mizorama chhunga cheng tan leh vawksa ei hlauhna chhan tur a awm lova, kan thil ei erawh a fai thain sa lam pang phei chu tha taka chhum a ni tur a ni.