2873/2025-2026

Siaha, 12 January 2026: Vawiin chawhma dar 10 khan DRDO Conference Hall, DC office complex Siaha-ah Siaha District chhunga PM Vishwakarma hamthatna diltute tana hriattur pawimawh te inhrilhriatna hun hman a ni a, Additional DC Pu Abraham Beirazi Khithie chuan khuallian niin a hmanpui.

Thu sawiin khuallian Pu Abraham Beirazi Khithie chuan ‘sawrkar laipui ruahmanna siam hrang hrang hi mipuite hian kan hre tawk lo fo thin a, state dang leh hnam dang kan phak lohna pawh niin a lang’ tiin mipuite beng tivartu ni turin department mi lehsa leh khawtlang hruaitu kalkhawmte a chah. Tun tuma telte chu ngun taka zirtirna ngaithla a, an hriatthiam loh leh hriatchian lohte zawh inthlahrung lo tur leh mi dang rawn tlaka hrechiangtu ni turin a chah bawk.

Hmathlir thui tak neih a tul thu khuallian hian sawiin, hlawhtling tur chuan hmathlir thui tak kan neih a ngai a, finna kan neihte hi tih tak takna nena hna thawhna tur a ni a, sum dawn duh vang chauha hna kan thawk chuan kan dingchhuak ngai dawn lo, hamthatna hnuaia loan lak theihte pawh hi tha taka rulh nachang hria ila, hma thar lakna tur loan liantham zawk pek chhunzawm zel chakawm khawpin hna kan thawk tur a ni a ti.

Vawiin hun hmannaah hian department official, bank official, Village council hruaitute bakah PM VISHWAKARMA hnuaia hamthatna diltute an tel a. Chawhnu lamah thupui then hrang hrang hmangin zirhona neih niin zawhna leh chhanna hun hman a ni bawk.

Sawrkar laipui Ministry of Micro, Small & Medium Enterprises, Br MSME-Development and Facilitation Office, Aizawl, Deputy Commissioner Office, Siaha leh Mizoram Sawrkar Department of Industries and Commerce tangkawp buatsaih Siaha district-a PM VISHWAKARMA hnuaia hamthatna diltute tana inzirtirna hi district dangah pawh neih chhunzawm zel tum a ni.