No.7262/2020-2021

Vawiin chawhma dar 11:00Am khan District Medical Superintendent Office, Siaha-ah Covid-19 hri danna pek chhuah tanna programme hun hman a ni. Dr. C. Hnichho, CMO chuan he programme hi a kaihruai a ni.

Vawiin Covid-19 Vaccine pek tanna programme hi  Pu Kesavan R, IAS, Deputy Commissioner, Siaha chuan Khuallian niin a hmanpui a, thu sawina hun hmangin; Covid-19 hripui avangin khawvel hmun tinah buaina leh harsatna namen lo kan tawk a, keini Siaha district ngei pawh kan bang bik loh a ni, a ti a. Chief Medical Officer leh a staff te bakah Tlawmngai Pawl, Kohhran,VC, Sawrkar official te bakah VLTF leh mipui te thawhrimna leh inpekna zarah district dang te aiin kan ziahawm zawk a, Siaha district mipuite aiawh pawhin lawmthu ka sawi bawk a ni tiin, ram, hnam leh a chhunga chengte tana kan hnathawh hi chawlhsan mai lovin nasa lehzual a tan la sauh sauh tura sawmin, a chah hlawm bawk a ni.

Covid-19 Vaccination hawnna Programme tawi hman zawhah COVID-19 hri danna (vaccine), "Covishield" chu Siaha District a Healthcare Worker te hnenah pek chhuah tan nghal niin, Vaccine la tur Healthcare Worker te hi Co-Win App a dahluh sa vek an ni a, an vai hian mi 719 an ni. Vawiin bika Vaccine la tura thlan te hi mi 100 an ni a, Siaha district a Covid-19 Vaccine la hmasa ber ni turin Dr.S. Vabeilysa,SMO District Hospital, Siaha chuan hma a hruai a, a dawtah Dr. S.Beihrokhu, MD chuan a la ve bawk a ni. Vaccine hi kar khatah vawi thum tal la tura ruahmanna siam a ni.

Dr. Lalnunziri, DIO chuan an hmalakna tlangpui report pein, he Covid-19 Vaccine hnathawh dan leh a hlauhawm lo ziahte sawiin, Dr. C. Lalrosanga, DMS chuan lawmthu sawiin vawiin Covid-19 Vaccine pek runpui hawnna programme hi a titawp a ni.