Nimin leh vawiin khan Saiha District ah Tourist lodge 7 hawn a ni a. Tourism Minister Pu John Rotluangliana’n Maubawk Tourist Lodge, Zawngling Tourist Lodge leh Phura Tourist Lodge te a hawng a. Parliamentary Secretary  Pu TT Zothansanga’n Niawhtlang Tourist Lodge leh Chakheitla Tourist Lodge hawngin Pu V. Laremthanga, Secretary chuan New Laty Tourist Lodge leh Serkawr Tourist Lodge te a hawng thung a ni.

Tourism Minister chuan Maubawk, Zawngling leh Phura khaw mipuite chu Tourist Lodge neitu dik tak an ni, a ti a. Tourist Lodge hawn thar chu khaw mipuite tana hlawkna leh tangkaina nasa tak nei tur a nih thu tarlangin, a remchan dan angin khaw mipuite chuan an hmang thei dawn a ni, a ti. Tourist Lodge hawn ni chu khaw mipuite tan ni chhinchhiah tlak tak a nih thu sawiin, an thil dawn thar chu dimdawi tak leh neitu thinlung pu chunga theihtawp chhuaha enkawl leh venhim hna thawk turin khaw mipuite chu a chah nghal a. Tourist Lodge hman dan chungchangah tu mah lal bik emaw, VIP bik emaw an awm loh thu sawiin, a thleng hmasa apiangte duhsak an ni tur a ni, a ti.

Tourist Lodge hawn inkhawm hi Tourism Director Pu Vabeiha Hlychho-in a kaihruai a. PWD (Building) Chief Engineer Er Lalmuankima Henry hnen atangin technical report ngaihthlak a ni.

Tourist Lodge hawn thar takte hi sawrkar laipuia Tourism Ministry atanga sum hmuh hmanga sak a ni a. Maubawk Tourist Lodge hi cheng nuai 137.93 senga sak niin, Zawngling Tourist Lodge hi cheng nuai 107.05 senga sak a ni a; Phura Tourist Lodge hi cheng nuai 253.59 senga sak a ni bawk. Tourism Minister hi Tourism Secretary Pu V.Lalremthanga IAS, Tourism Director Pu Vabeiha Hlychho leh MADC hotute’n an tawiawm a. Tourist Lodge hawn zawh hian Tourism Minister chuan Palak dil leh Longmasu te a tlawh nghal a ni.