Vawiin chawhma dar 11:00AM khan Siaha District Bawrhsap thar Pi Harleen Kaur IAS chuan a Office Chamber-ah Siaha District MJA Member te Thingpui inpuiah sawmin, inkawm hona hun hlimawm tak an hmang.

Pi Harleen Kaur chuan Siaha District tan theitawp chhuaha hnathawh a tumna kawngah Siaha District MJA te chu amah tawiawm tur leh finchhuah thin turin a ngen hlawm a. MJA Member te pawhin theitawp chhuaha tawiawm zel an tum thu Pi Harleen kaur chu hrilhin, Siaha District in harsatna an tawh hrang hrang te DC hnenah hian an thlen nghal a ni. Siaha MJA te din Siaha District Development Vigilance Committee (SDDVC) hnathawh leh hmalak tawhna te hrilhin, Siaha District tih hmasawnna kawnga DC hmalakna reng reng phur taka an tawiawm tlat tur thu an hrilhriat bawk.

MJA te chuan Pi Harleen-i chu Siaha District mipui ten a lakah beisei sang tak an neih thu hrilhin, a DC chhunga District-a thingtlang khua zawng zawng tlawhchhuah a, mipui harsatna te a hmunah zirchiang se, mipui te nen inpawh taka hnathawk thin turin duhsakna an hlan a. Dikna , Rinawmna leh Siaha District hmangaihna nena a thawh chhung chuan MJA chuan a hnung an dawl zel tur thu an hrilh bawk a ni.

Vawiin inkawmhona-ah hian Pu N.Chakhai, Addl.DC, Pi Marilyn Rualzakhumthangi, SDO(S), Pu Andy Lalfakzuala Varte, SDC leh Pu N.Vabeiratlua, DIPRO ten Pi Harleen Kaur IAS hi an tawiawm a ni.