Vawiin chawhnu dar 1:00pm khan Pu Zoengsanga, DEO leh District Bawrhsap ni bawk chuan a office chamber-ah Siaha District a MPF(Mizoram People Forum) hruaitute a kawm.

Vawiin meeting-ah hian MPF Siaha District Forum hruaituten kan hma lawka MLA Inthlanna lo awm turah, inthlanna thinghlim,  muanawm leh huapzo a awm theih nana an hmalak tawhna leh hmachhawp te DEO hnenah report an pe a.

Inthlanna thianghlim, muanawm leh huapzo a awm theih nan Siaha District MPF te hian Biak In tina chhiarchhuah tur Kohhran mipui te hnenah NGENNA siamin, chhiarchhuah vek tawh a ni a.

39- Siaha(ST) AC leh 40-Palak(ST)AC hnuaia PWD( Person With Disability- Rualban lo) mi 25  te pawhin tha taka Vote an thlak vek theih nan ruahhmanna fel fai tak Election Branch te nen an siam vek thu pawh an tarlang bawk.

Candidate chiangkuang tak an awm hnuah Joint Platform buatsaih te, Cable TV kal tlanga Talk show neih tur te chu an hmachhawp langsar zual te a ni a. Vote thlak hma Sunday ni hnuhnung ber( 25th November)   inkhawmah Thusawituten Inthlanna Thianghlim chungchang lam hawia Sermon thlak vek turin Kohhran tin ngenna an siam bawk dawn a ni.

Pu Zoengsanga DEO chuan MPF te hi Mizoram pawn lam thlenga Mizoram chhunga Election hmel timawitu leh State dang te entawn leh sawihat tling in ni a. Kan District MPF ten in hmalak tawhna leh inhmachhawp hrang hrang te leh inthawm riva han hriat hian,  nang ni nen chuan Siaha District hian Inthlanna muanawm, thianghlim leh huapzo ber kan nei dawn in ka hria a, ka hlimin ka phur tak zet a ni,  a ti.  Pu Zoengsanga chuan  harsatna in nei phawt chuan kei leh ka staff te hi MPF tan kan inhawng reng a, inthlahrung hauh lovin engtik lai pawha pan thei reng kan ni ang, a ti bawk.