4385/2023-2024

Dated Siaha 30th March 2024: Member of Parliament (LS) inthlanpui lo awm tur atana inbuatsaihna kal zelah vawiin khan Pu V.L. Hruaizela Khiangte, District Election Officer kaihruaiin Siaha khaw pawna awm - Noaotlah, Lobo leh Chhaolo khuaa Polling Station- te thlawh a ni a, Pu K.L. Vulmawia, Superintendent of Police, Pu Lalbiaknia (SDC), Pu Thomas Maratha Hlychho (SDC), Pu R. Lalnunpuia, Dy.SP leh Pu Zonunchama Ralte ( DIPRO) ten an tawiawm a ni.

Pu V.L. Hruaizela Khiangte chuan Member of District Council (MDC) inthlan ah vote tla a tha thin hle a, MLA - ah tlemin a chhe leh deuh a, MP Election- ah vote tla a hniam fal hle thin a, theihtawp chhuaha hma lak a tul hle a ti a. A bik takin MLA leh MP election - ah Election Commission of India (ECI) phut chin margin kan pha lo hle thin a, kumin inthlanpuiah chuan mipui tam zawkin vote an thlak theuh theih nan hmalak mek zel a ni, a ti a. Block Level Officer ( BLO ) leh Village Council Member-te chu theihtawp chhuahpui turin a sawm a, vote thlak ni hma ngei a khawtlang information kaltlanga vote thlak ngei tura ngenna mipuite hnena lo puang zar turin a chah a ni.

Pu V.L. Hruaizela Khiangte chuan vote thlak hi khua leh tui tha ten an tihtur pawimawh tak pakhat a ni, a ti a. Vote thlak ni tura duan ni 19, April, 2024 zing dar 7 atangin vote thlak tan a ni dawn tih sawiin, huan leh ram lama hnathawk thinte pawhin an hnaa an kal hma ngei a vote an thlak theih nan a tul anga hma lo la turin BLO leh VC- te a chah a. India rama rorelna sang ber Parliament- a mipuiten an aiawh an thlanchhuahna pawimawh tak a nih angin, mipuiten an duh zawng tak an thlan tlin theihna turin District Election Official-ten theihtawp an chhuah a ni tih tarlangin, BLO leh VC- ten an phak leh theih chin chinah thahnem ngai tak tan lo la turin a sawm bawk.

Pu K.L. Vulmawia, Superintendent of Police chuan inthlanna felfai leh thianghlim tak awm turin Police Department- ten Dan leh thupek an kengkawh mek tih a sawi a. Mipuiten ralmuang taka vote an thlak theihna turin hmalak mek zel a ni tiin, Election Commission of India- in a phut ang thlapin dan leh thupek an kengkawh dawn tih tarlangin, mipuite pawhin theihtawpa lo tawiawm turin a ngen a ni.

Vawiina Polling Station tlawh takte hi Noaotlah khuaa Polling Station-I, vote- 643 awmna, Polling Station- II, vote- 614 awmna , Polling Station - III, vote- 187 awmna bakah Lobo Polling Station, vote- 709 awmna leh Chhaolo -I, Polling Station Vote-730 awmna, Chhaolo- II Polling Station vote- 200 awmna te an ni. Pu V.L. Hruaizela Khiangte leh amah tawiawmtu te hi Polling Station tina BLO ten a hmunah an lo hmuak zel a ni.

Pu V.L. Hruaizela Khiangte, District Bawrhsap leh Pu K.L. Vulmawia Superintendent of Police- te chuan Chhaolo khuaa Mara Student's Organization (MSO) General Conference vawi - 40 hmanna tura 'Pandal' sak mek chu an tlawh nghal a. MSO hruaituten General Conference- atana mamawh an lo thlente chu tihhlawhtin sak ngei an tum thu an sawi a. Primary Health Centre ( PHC) Chhaolo, pawh an tlawh nghal bawk.