870/2024-2025
Dated Siaha 19th June 2024: MADC hnuaia 07- Chakhei MDC Constituency leh Village Council Constituency pathum, 25- New Siaha East -II, 91- Lopu leh 94-College Vaih-III, by-election neih tur atana inbuatsaihna kal zelah vawiin chawhnu dar 1 khan  Pu V.L. Hruaizela Khiangte, District Election Officer (DEO) chuan NGO leh Political Party aiawhte DC Mini Conference Hall- ah thutkhawm a neihpui.

Pu V.L. Hruaizela Khiangte chuan State Election Commission (SEC) phut ang a thutkhawm koh a nih thu tarlangin, NGO leh Party aiawh lokalte chunga awmthu sawina a nei nghal a. 07- Chakhei MDC by- election neih turah Candidate pathum ten hming thehlut tawhin vawiin chawhma khan scrutiny pawh neihfel tawh a ni, a ti a. June ni 28 ah  vote thlak tur niin, July ni 2 ah vote chhiar a ni dawn a, khauh takin Model Code of Conduct (MCC) pawh kalpui mek a ni a, June ni 21 thleng Candidate-te tan in hnuhdawk (withdrawal) hun hawn niin, hemi ni hian  valid candidate- te puan bakah  election symbol pek an ni nghal ang a ti.

Pu V.L. Hruaizela Khiangte chuan inthlanna felfai leh thianghlim tak awm turin Election Official-ten engkim an ti vek seng lo a, NGO leh party lamten theihtawp min chhuahpui a ngai takzet a ti a. Siaha District- a NGO lian ber Mara Thyutlia Py (MTP) Mara Chano Py ( MCHP) leh Mara Students'  Organisation (MSO) te chu mipuite tana  theihtawp chhuah thin an nih angin, by- election lo awm turah pawh ram leh hnam tana penchhuak a, inthlanna tha tak nei tura thawhpuiah  a sawm a.  Political party leh NGO- te chu eng kawngin  nge Mara ram hmasawnna tura kal zel an tum tih chu  uluk taka an  ngaihtuah a tul hle tih sawiin, tun inthlan lo awm turah pawh  sum leh pai seng nasat lutuk awm lo tura kan thawhho a tul tak zet a ni tiin thawhpuiah a sawm.

District Election Officer (DEO) chuan  Election Official lam atangin engmah in tihluih theih a ni lo a, a ram leilung fate ngeiin ram tana tha leh dik titura hmalak a ngai a ti a. Political party - te chu inthlan dawnah theihtawpin lo inbei thin mahse, election zawhfel a nih chuan tupawh lo sawrkar se,  ram leh hnam thatna turah chuan tha taka  tawiawmtu nih a tul hle a ti. MTP, MCHP leh MSO te chu  inthlanna felfai awm turin an pawimawh takzet tih sawiin, press release leh kawng dang zawng pawha tan lakpui turin a ngen a. A  bik takin Chakhei constituency hnuaia an branch te chu  thurawn pe a, sum leh pai senral tam lutuk tur venpui tur leh a tul anga election official- te lo thawhpui tura hmala turin a ngen bawk.

Pu V.L. Hruaizela Khiangte chuan India ram chu khawvela  democracy ram lianber a nih angin, mipuiten an aiawha roreltu tur an thlan chu thil pawimawh ber pakhat a ni,a ti a. Zalen leh ralmuang taka inthlanna nei turin election official- te chauh an tawk zo lo a, NGO, Kohhran, political party  leh mipuite pawh kan tan ho a tul hle a ti a. Tuna MDC by election zawhfel a nih hunah pawh VC by-election neih leh tur a ni a, tumah inthlahdah hman  kan awm lo a ni tiin, NGO, Kohhran leh Party mi leh sa te chu theihtawp chhuahpui turin a sawm nghal a ni.

Pu K.L. Vulmawia, Superintendant of Police (SP) chuan  ralmuang taka inthlanna  awm turin venhimna  lamah  pawh  theihtawp chhuah mek zel a ni, a ti . Tun dinhmunah  harsatna an tawh lo thu sawiin, a tul ang zelin hmalak a ni ang a ti a. Boruak muanawm tak hnuaiah mipuiten zalen taka vote an thlak a beisei tih tarlangin, boruak awm dan a zir zela an chetchhuah tur thu a sawi.

Pu Abraham Beirazi Khithie, Assistant Returning Officer (ARO) chuan boruak muanawm tak hnuaia inthlanna nei turin election official ten theihtawp an chhuah mek thu a sawi a. NGO- te thawhpuina tello chuan inthlan a harsa dawn hle a, chuvangin NGO-ten theihtawp min  chhuahpui rawh u tiin a sawm a . Election official -te chu a tlem zawk an nih thu tarlangin, NGO leh Party lam kutah thui tak an in nghat a ni tiin, kawng engkima thawhpuiah a sawm a ni.

Pu N. Solomon Beihlotha, AGS, MTP chuan technology khawvelah kan awm avangin, fimkhur a tul hle a, a bik takin by- election neihna tur panna kawng tha mamawh a ni tiin, official-te theihtawp chhuah turin a ngen a. By-election neihna tur khuaa MTP branch te pawh a tul anga hmala tur leh election official- te lo thawhpui tura an hrilhhriat tawh thu a sawi a. Pi. B. Zaeli, MCHP, Finance Secretary, chuan Chakhei MCHP Sub- Headquarters leh MCHP Branch -te thurawn an pek tawh thu a tarlang a. Pu Elson Eliasah Notlia, President, MSO pawhin MSO, sub - headquarters, Chakhei te chu inthlanna felfai tak awm tura an theihna zawna tan lo la tura ngenna an siam tur thu a sawi bawk.

Political party aiawhte pawhin thusawina neiin, inthlanna felfai leh thianghlim  tak a awm theih nan a DEO,  Election Official leh Staff-  te thawhrimna fakawm an tih thu an sawi a. Inthlan campaign thianghlim taka kalpui an tum thu tarlangin, ram leh hnam tana a tha zawnga   thawh zel an tum thu an sawi bawk a ni.

Pu V.L. Hruaizela Khiangte, District bawrhsap leh Returning Officer (RO) nibawk chuan lawmthu sawina neiin thutkhawm hi a khar.