1628/2026-2028

Siaha the 3rd August 2026: Siaha District Election Officer Pu VL Hruaizela Khiangte chuan Special Intensive Revision (SIR) 2026 kalpui mekah vawiin khan Siaha District a hearing neih mekna khua te chu a hmunah kalchilhin a tlawh.

District Election Officer chuan draft roll tarchhuah taka hming chuang rinhlelawmte emaw, hming chuang tur dik tak chuanglote enfela chinfel chu ECI in a ngai pawimawh hle a, hearing chu mahni dikna humhimna hun tha tak a nih angin ngaih pawimawh a tul a, siam dik ngai a awm chuan tihdik a tul thu a sawi. Electoral Roll a chuang thei chu India khua leh tui, Kum 18 tling chin an ni a ti a, party hamthatna duh avanga roll a chuang theilo tur thunluh an nih loh nan fimkhur hle turin leh chutiang lakah venpui turin Khawtlang hruaitute a sawm a ni. Roll a thianghlim chuan inthlanna (election) a felfai thin a, mipui thlan sawrkar felfai tak a piang thin tiin theihtawp chhuahpuiah NGO te leh Khawtlang hruaitute a sawm bawk.

Vawiina District Election Officer in a tlawh tak khuate hi Thosai leh College Vaih II a ni a, 39-Saiha (ST) AERO Pi H Lalenkawli leh Pi Zorinsangi ten draft roll tarchhuah taka no mapping leh discrepancy awm te enfelin hearing an kalpui mekna te a ni.

Special Intensive Revision 2026 kalpui mekah Electoral Registration Officer (ERO) te leh Assistant Electoral Registration Officer (AERO) te chuan District chhunga hmun hrang hrangah hearing an kalpui mek a. Hetah hian draft roll a rinhlelawmte chu kovin insawifiahna hun pek an ni. District Election Officer hi Election Officer Pu Vabeimozachhi Chozah bakah BLO te leh khawchhung hruaituten an tawiawm a ni.