1629/2026-2028

Dated Aizawl, the 3rd August, 2026: Vawiin chawhma dar 11 khan Pu PC. Vanlalruata, Minister, Agriculture, etc., chuan Government T. Romana College aṭanga zirlai pass chhuakte puala lawmthu sawina leh zirlai lut tharte lawmna hun Dawrpui Multipurpose Centre, Dawrpuia neih chu khuallian niin a hmanpui. 

Khuallian chuan Government T. Romana College-ah a lo thawh ve thin tawh thu leh chhungkua anga a la ngaih reng thu a sawi a. Zirlai zawng zawng lenna hall an nei lo chu a sakna hmunhma an nei a nih chuan ngaihtuah dan kawng zawnpui a tum thu a sawi. Zirlaite leh zirtirtute pawimawhna a sawi a; zirtirtu ṭha tak takte tel lo chuan zirlaiin hlawhtlinna an chang thei lo va, chutiang chiah chuan zirlai naupang ṭha leh tumruh tak tak tel lo chuan hlawhtlinna lawm tur a awm thei lo, a ti. 

Tunlai hunah thiamna a sâng tawh a, thluak fim tak hmanga inelna khawvel a nih tawh thu Minister-hian sawiin, zirlai lut thar leh kal chhuakte chu tumruhna neia lehkha zir tur leh insumtheihna leh insiamṭhat ngaihna lai apiangah mahni insiamṭhaa hmalam pan tum tur leh Pathian ngaihsakna nena hun hmang ṭhin turin a chah bawk. 

Minister Pu PC. Vanlalruata hian Government T. Romana College aṭanga 2025-2026 Mizoram University hnuaia rank holder mi 11 hnenah lawmpuina thilpek a hlan bakah annual magazine ‘Raltiang’ a tlangzarh nghal. 

Principal Dr. Jenifer Lalbiakdiki pawhin thu sawiin, “Miin in chunga an tiha in duh tûr ang zêlin, mi chungah pawh ti ve rawh u” tih chu vawng reng turin zirlaite a chah a. Zirlai lut tharte lawmna thu sawiin theihtawp chhuah turin a  sawm a ni. 

Government T. Romana College zirlai zingah best students of the year mipaah Vanlalṭhatluanga leh hmeichhiaah Lalrinchhani te chu thlan an ni a, Best Library User-ah Lalnunfeli thlan a ni bawk. Kum 2026-2027 academic session-ah zirlai lut thar 356 awmin, graduate thar 252 an awm a, zirlai 956 an awm mek a ni.