Vawiin chawhma dar 7:00Am khan Siaha District chhunga Sports Infrastructure( Infiamna lama hmasawnna ruhrel) siam ngai leh thuam that ngai te a hmunah  Er. Michael C.Lalmuanpuia, Consultant, Lushai Engineers Consultancy Firm,Ramhlun South, Aizawl leh athawhpui ten an fangkual.  

New Siaha venga MYA( Model Youth Association) Hall-a Badminton Court, a chhuat phah turte, New Siaha East-II a Community Hall thuamthat ngai te, Hall  kawta VolleyBall leh BasketBall Court siamna tur te leh Siaha District mipui ten nghakhlel taka an lo  thlir thin, Astro Turf phahna tur  Meisatla khelmual te a hmunah tlawhin, measurement lak ngai leh tihtur tul ang ang te an ti. 

Siaha Districts hian an District chhungah khelmual pakhatah tal Astro Turf phah sak turin Sports Minister Pu Zodintluanga hnenah an lo ngen tawh thin a. Tunah chuan tlumte thlira an lo thlir thin Astro Turf phah khelmual chu hun reilo teah neih theih dinhmunah an ding ta. Astro Turf phah nan hian sum sanction pawh a awm vek tawh a, Lushai Engineers Consultancy Firm ten Khelmual Data hrang hrang an lakkhawm te an zirchian hnuah Astro Turf phah hna hi an tan nghal mai dawn a ni. 

Meisatla Khelmual hi  SSB (Sashastra Seem Bal) awmhmun khuarna hlui a ni a, Astro Turf phah a, Khelmual changtlung taka siam tur chuan a panna kawng (Approach Road) tha tak, Astro Turf phur lirthei kalna tur te, Gallery sakna tur te leh thiltul dang te ngaituah ngai a la awm nual a. He mi vang hian Siaha District Sports Committee te, Siaha District Football Association te leh MADC lama thuneihtute nena inrawn chung zela hmalak chho tur a ni. Lushai Engineers Consultancy Firm ten Astro Turf phah nan Meisatla Khelmual an lo zirchiang tih hriat a ni hian  Siaha District chhunga Sports lama tui mi te , MADC hotute, SDSC hruaitute leh SDFA hruaitute an lawm hle a. Lushai Engineers Consultancy Firm a Consultant Er.Michael C. Lalmuanpuia pawh a khelmual tlawhna-ah hian MADC hruaitu Pu N. Zakhai CEM, MADC, Pu V.VB Byhna EM (RD), Pu V.Zacho, Executive Secretary MADC te bakah Siaha District Sports Committee Hruaitute, Siaha District Football Association hruaitute, Siaha Town Jt. VC Chairman Pu VB Sachai te, Meisatla veng VC leh NGO hrang hrang hruaitu ten tawiawmin, Astro Turf phah khelmual kan neih ngei thei nan inpawh tak leh huangzau takin  inkawmhona hun an hmang bawk. 

Pu N. Zakhai CEM, MADC chuan inkawmhona-ah hian thusawiin, Chief Minister Pu Lal Thanhawla kaihruai sawrkarah hian Mara ramin rotling malsawmna kan dawng leh dawn a ni a.  Sports Minister   Pu Zodintluanga pawh Minister chak leh viak tha, thalai te hmakhua ngai em em tu, a thutiama ding nghet tlat mi, ni a an lo sawi thin kha, tunah hian a takin kan hmu tan mek a ni, a ti. 

Pu Michael C.Lalmuanpuia leh a team te hian Siaha khawchhunga tih tur an tih zawhah, Khopai khuaa khelmual chei that ngai en turin Siaha an chhuahsan nghal a ni.

Attachment

  • Loading attachment...