Vawiin khan Joint Action Committee Against Anti Tribal Bills, Manipur hruaitute te chuan 2015 a Manipur Assembly in tlangmi ten ram neitu an nihna ti derthawng thei dan a siam an duhlohna lantirna a nunna chan ta mi 8 te ruang la zalh loh te puala an hun hnuhnung ‘ Last Rites of the Tribal Martyrs’ chu Lamka, Churachandpur ah an buatsaih a. He dan lak a lungawi lohna lantirna a mi pariat te hian September ni 1, 2015 khan an nunna an chan a, tun thlengin vui an la ni lova. He vuina hun hmanpui tur hian Manipur JAC chuan Chief Minister Pu Lal Thanhawla chu an sawm a. Chief Minister chuan vawiin vek khan an sawmna chu chhang in, an sawmna in a  rilru a khawih takzet thu leh a hlut thu hrilhin, a damsam loh avangin doctor in hahdam tura  thurawn an pek avangin, he vuina hun a hmanpui thei lo chu pawi a tih thu a hrilh.

Joint Action Committee Against Anti Tribal Bills leh Mizo People Convention, United Zou Organization, Simte Tribe Council, Tedim Chin Union leh Young Paihte Association chuan tun hnai khan Manipur Sawrkar nen inremna thuthlung an ziak a, chumi ang chuan martar 8 te puala vuina programme Memorial Service chu nunna an chan hnu ni 632 zet a ral hnuin hman an remti a, vawiin khan memorial service (vuina hun)  chu Lamka ah an buatsaih ta a ni. 

Chief Minister Pu Lal Thanhawla’n Joint Action Committee Against Anti Tribal Bills hruaitute hnena  lehkha a thawnah  hian martar te vuina hun a tel ve tura an  sawm chu hlu a tih thu te sawiin lawmthu a hrilh a. “Thisena ka unaute bulah awmin he programme hi hmanpui ka duh che u a, mahse ka damsam loh avangin doctor ten chhuak lova hahchawl turin thurawn min pe a, he hun pawimawh leh urhsun tak hi ka hmanpui thei lo che u hi pawi ka ti hle a ni” a ti a. “Nunna chan martar 8 te hming hi tlangmite, a bik takin Manipur tlangmite thinlungah engtik ah mah a mit dawn lova, an hming hi kan thinlung ah rangkachak  ziak angin a riak reng tawh ang. An nunna hlu tak an hlanna hian Manipur tlangmite chakna leh in unauna phuar nghet zawk se, khawvel hmun hran hran a cheng, an mahni hluttute thinlungah pawh an inhlanna hi  cham reng rawh se,” tiin Pu Lal Thanhawla chuan a ziak a. “Unau kan ni, kan lawmna leh hlimnate, kan lungngaihna leh tawrhna te hi intawm zel ila, thisen chu tui aiin a tak a ni tih hi engtik lai mahin I theihngilh lovang u” tiin a chah bawk a ni.

JAC te sawmna lehkhaah hian Chief Minister Pu Lal Thanhawla’n Manipur tlangmite chu unau kan ni, thisen zawmpui kan ni, a tih fo thin leh thisen chu tui aiin a tak zawk tia hmun hrang hranga an thlavang a hauhna zawng zawngah leh an mahni a tanpuinaah lawmthu an tarlang a. A thusawi hian hun khirh leh hrehawm tak an tawn laiin Manipur tlangmite a thlamuanna thu te, himna leh hahdamna a pek thu te an sawiin lawmthu an hrilh bawk a ni. Chief Minister-in he an sawmna lehkhathawn a chhanna hi vawiin a Memorial Service neih tak ah hian chhiarchhuah a ni.