3927/2023-2024

Dated Siaha 22nd February 2024: Vawiin chawhnu dar-1 khan Urban Development & Poverty Alleviation (UD & PA) huaihawtin Siaha District-in Mizoram Cleanliness Competition 2023- a pathumna dinhmun a hauh chu urhsun taka lawmna MADC Golden Jubilee Hall- ah neih a ni a. Pu. M. Laikaw, CEM, MADC chuan khuallian niin a hmanpui a, Pu K. Chhuabei, EM, LAD, MADC -chu khualzahawm ni bawkin Pu Lalhmunsanga Hnamte District Bawrhsap chuan inkhawm hi a kaihruai a ni.

Khuallian Pu M.Laikaw chuan Siaha District-in faina lama rahbi thar a kai chu lawmawm hle tiin faina kawnga theihtawp chhuahtu zawng zawngte zahna chibai a buk tih a sawi a. District- fai inelna a Pathumna dinhmun an hauh chu a bul tanna chauh a ni tiin, hmabakah tih tur tam tak a la awm a 'tan I chhuah thar zel ang u' a ti . Hun lo awm turah Siaha District- in Mizorama District faiber nihna a hauh theih a beisei tlat tih tarlangin, pakhatna dinhmun hauh a nih hunah ruai nen ropui taka lawm a tum thu a sawi.

Pu M. Laikaw chuan tun dinhmun an thlen theih chhan chu thawhhona tha a awm vang a ni tiin, MADC, State leh Central- sawrkar bakah VC, NGO leh Mara mipuite inkarah lungrual taka thawhhona a awm tih chiang takin a lang a, a lawmawm hle a 'I vawng nung zel ang u' a ti. Faina hian mihring hmasawnna a keng tel tlat a, hmasawn turin faina lamah pawh tan lak chhunzawm zel a tul a ti a. Mimal pawimawhna sawiin Pu M. Laikaw chuan mahni theuhah tan la thar ila, chu chuan faina lamah rahbi thar min kai tir zel ang a ti. Sawrkarin theihtawp chhuah thin mahse NGO, VC leh mipuite tel lovin hlawhtinna a awm thei lo tiin hmalam hunah pawh tha tak a sawrkar lo tawiawm zel turin a ngen a ni.

Chhungkuaah tan lak a ngai takzet tih sawiin khuallian chuan nu leh pa ten fate zirtirna kawngah pawh tan la thar ang u a ti a. Chhungkuaah in zirtirna tha tak a awm chuan an nunah a bet tlat tawh thin a, an than len zel naah faina zirtir hranpa an ngai tawh lo a ni, a ti. A lang thei chin chauh a fai ang a, a lang lo lam hi a lo bal hle ang tih a hlauhawm hle tiin Pu M. Laikaw chuan mahni In leh lo tihfai lam pawh uar hle turin a chah a. Incheina changkang tak tak inbel aiin kan incheina chu a fai tawk em tih hi ngaihpawimawh zawk tur a ni, a ti bawk.

Pu M. Laikaw chuan pawnlam fai leh thianghlim piah lamah rilru thianghlim neih a pawimawh hle tih a sawi a. Rilru thianghlim nei lo tan faina tluan tling a neih theih loh tiin rilru hrisel leh thianghlim nei theuh turin kalkhawmte a chah a. 'New Maraland Vision' - kalpui mek a nih thu a tarlang a. He vision awmzia ber chu Siaha District- chhungah Central, Mizoram leh MADC -hnuaia sawrkar hnathawkte hian inthliarna, in enhranna leh anni leh keini tih awm lo a, lungrual leh thahnem ngai taka mipuite tana thawh hi a ni, a ti. Siaha district- a sawrkar hnathawk awmte chu Siaha mipuite hmasawnna leh hamthatna tura thawk zel turin a sawm nghal bawk.

Khualzahawm Pu K. Chhuabei, EM, LAD, MADC- pawhin thutawi sawina neiin, Faina lam ngaipawimawha thawktu zawng zawngte an zahawmin fak an phu tak zet a ni, a ti a. Siaha District -in mellung thar a kai hi a ropui hle tiin hmasawn zel tura hmalak erawh a tul hle ang a ti. 'Tihdam aiin inven a tha zawk' tih a nih ang bawkin 'tihfai ngai lova inven' hi kan tihmakawh a ni a, bawlhhlawh siam lo a, inven kawnga tan la thar turin kalkhawmte leh Siaha mipuite a sawm a ni.

Pi B. Malsawmtluangi, DPO, UD& PA chuan report pekna tawi a nei a. Mizoram Cleanliness Competition 2023 - chu October ni 9, 2023 khan tan a ni a, sawrkar Department hrang hrangte, VC, NGO leh mipuite thawhhona tha tak avangin tun dinhmun an thlen thu a tarlang a. Siaha district- ah UD & PA hnuaiah Community Toilet-9 leh Community Urinal- 5 awm mekin hengte hi theih ang ang a cheibawl that zel a ni a, sak belh ngai a awm pawhin, ram petu an awm phawt chuan sak belh theih zel a ni, a ti. Hman khat daih sarang hmang lo tura inzirtirna bakah faina lama inzirtirna chu kawng hrang hrangin kalpui chhunzawm zel a nih thu a tarlang bawk.

Vawiin inkhawmnaah hian Siaha District- chhunga faina lama titha- School, Bazar, Hospital, sawrkar Office, lemziak, Fakna hla sak , veng leh Hotel - hnenah lawmman semna, NULM - ten an nei a. Pu Henry PL Hnaihly, SO, LAD, MADC- kaihhruaiin Faina thutiam sawihona neih a ni bawk.

Vawiin Siaha District- in Mizoram Cleanliness Competition 2023- a pathumna dinhmun a hauh lawmna inkhawmah hian Pu Lalhmunsanga Hnamte, District Bawrhsap chuan kalkhawmte lawmna thutawi sawiin Pi S. Lalmuanpuii, Sr. LAO, LAD, MADC chuan kalkhawmte hnena lawmthu sawina neiin hun a khar a ni.

Mizoram Cleanliness Competition 2023- result puan takah khan Siaha District chuan Category -II "District Headquarters" hnuaiah Pathumna dinhmun a hauh a, lawmman atan 'Certificate' bakah cheng- 1,00,000 Urban Development & Povery Alleviation ( UD & PA) atangin a dawng a ni.