3926/2023-2024

Khawzawl 22nd. February, 2024 : National Assessment and Accreditation Council (NAAC) Peer Team te chuan nimin leh vawiin khan Govt. Khawzawl College an endik.

NAAC Peer Team te hi Chairperson Dr. Jagrup Singh Sekhon, Guru Nanak Dev University, Amritsar, Punjab-a Professor hlui te, Member Coordinator Dr. Perveen Akhter Pandit, Central University of Kashmir, Jammu and Kashmir-a Professor ni mek leh Member Dr. Sanjay Dhanwate, Narayanroa Kale Smruti Model College, Karanja Ghadge District Wardha, Maharastra-a Principal te an ni a. Nimin chawhma dar 11:00 khan Govt. Khawzawl College thlengin GKC Staff te leh zirlaiten an lo hmuak a. Hemi hnu hian GKC Building leh Facilities hrang hrang te a hmunah kalin an tlawh a, Principal Charge la mek tu Pu Umanda Singh bakah Teaching Staff te, zirlaite, zirlai nu leh pate leh College atanga lo zir chhuak tawh te an kawm a. Nimin tlai khan Cultural Programme buatsaihsakin zirlaiten hnam lam chi hrang hrang an entir a ni. Vawiinah endikna hi nei chhunzawmin vawiin tlai khan endikna hi an zo fel a ni.

NAAC hi India ram zirna sang College leh University te endik a grade petu an ni a, Govt. Khawzawl College hi tunah hian 'C' Grade-ah awmin, Assessment hnuhnung berah khan 'B' Grade an pha lo deuh a. Govt. Khawzawl College-ah hian tun dinhmunah Teaching Staff 22 leh Non Teaching Staff 10 an awm mek a. Subject zir theih hi 6 - Economics, Education, Political Science, Mizo, English leh History Subject te a lak theih a ni.