3925/2023-2024

Lawngtlai dated 22nd February 2024: Vawiin khan DC Conference Hall, Lawngtlaiah Pu C.Lalrosanga, MP (Lok Sabha) kaihhruaina in District Development Co-ordination and Monitoring Committee chuan thutkhawmna an nei a. Lawngtlai district chhung a Sawrkar laipui hnuai a Scheme hrang hrang kalpuitu department leh tlawmngai pawl hruaitute an tel a ni.

Pu C.Lalrosanga, MP chuan Lawngtlai district chhung a Department hrang hrang kaltlang a Sawrkar laipui scheme kalpuina vilpui tur leh sawt zawk leh awmze nei zawk a kalpui tur a harsatna awmte sawi hona turin District Development Co-ordination Committee chu din a nih thu a sawi a. Sawrkar kaltlang a hmalakna kawng ah Sawrkar a thawktute bak ah khawtlang leh tlawmngai pawl hrang hrang hruaitute ngaihdan ngaihthlakna hun pawimawh tak a nih thu a sawi bawk a ni. Pu C.Lalrosanga chuan DISHA thutkhawm hmasa a lo rel tawh angin Lawngtlai leh Siaha inkalpawhna tur a ‘Permanent Bridge over Tuipui Ferry’ sakna turin DPR ruahman a nih tawh tih tarlangin he lei hi metre 257.8 a sei leh metre 12.15 a zau tur a nih thu a sawi a. He hmalakna hi a hlawhtlin chuan Lawngtlai leh Siaha khawpui inkar kal hun chhung hi nasa tak a tih tlem a nih tur thu a sawi a ni.

Vawiin Lawngtlai DISHA thutkhawmna ah hian kum 2023-24 chhung a Department 17 hnuai a Sawrkar laipui scheme kalpui dan thlirletna neih a ni a. MGNREGA hnuai a chhungkaw 37751 te hnen ah ni 81 inhlawhna siam a nih thu te, hna 2533 zawh fel tawh bak ah a dang 729 kalpui mek a nih tih tarlan a ni a. Bank account leh Aadhaar card inthlunzawm kawng a harstana awm thin te sawi lan a ni. PWD hnuai a Pradhan Mantri Gram Sadak Yojana kaltlang a hna hlawm 20 kalpui zingah 13 chu zawh fel tawh niin hna 7 thawh mek a nih thu tarlan a ni a. Fur hma a hna tam zawk zawh fel a nih theih nana hmalak dan tur te sawi ho a ni a, hna tha tak a thawh a nih theih nan tlawmngai pawl te nen hna invilpui theih dan tur te pawh sawi lan a ni.

Kawlphetha avang a Lawngtlai district-in harsatna an neih thin dan leh heng harstana sutkian nana P&E department hnuai a 25 MVA, 132/33kV Sub-Station sak hna te, lo, huan, ram a kawlphetha pawh luhna tura a hranpa a 11kV feeder siam a nih thu leh Power System Development Fund hnuai ah kawlphetha hrui pui hman lai a tha zawk a thlakna tur dilna thehluh tawh a nih thu tarlan a ni bawk. Lawngtlai district khaw hrang hranga in 24082 chu Jal Jeevan Mission kaltlangin tui thianghlim her haw theih a thlunzawm an nih tawh thu sawi niin ODF+ dinhmun luah thei turin khaw hrang hrang ah hmalakna chak tak a kalpui mek a nih thu tarlan a ni.

Thutkhawmna ah hian hriselna kawng a inzirtirna uar zawk a kalpui a tul thu te, sawrkar department hrang hrang hnuai a hamthatna awm te zau zawk a tlangzarh a pawimawh thu te sawi lan niin Lawngtlai khaw chhung a ATM khawl bun belh a nih theih dan tur te sawi ho a ni a. Central Young Lai Association, Village Council Association, MHIP leh LWA hruaitute he hun ah hian an tel bawk a ni.