4430/2025-2026

Dated Siaha, the 12 February, 2026: Vawiin chawhma dar 11:00A.M khân Krishi Vigyan Kendra (KVK) Conference Hall, Siahatla, Siahaah Scientific Advisory Committee vawi 17-na ṭhutkhawm a ni a, he hun hi Pu Lalengliana, Joint Director (FW) Agriculture & Farmers Welfare Department-in a kaihruai.

Pu Lalengliana chuan member kal khawmte inlawmna thu sawiin, 'KVK hian mipuiin thlai chi ṭha zawk kan neih theih nân leh hlawk zawka kan tharchhuah theih nân kawng hrang hrangin hma an la a; an pawimawhna hi mipuite leh sawrkar pawhin a hriaa, min hriatpuitu an awm tawh avangin ṭan kan lâk deuh deuh a ngai a ni, a ti.

Dr. H. Vanlalhmuliana, Sr. Scientist & Head, KVK Siaha chuan KVK Siaha dinhmun leh kum hmasa lama an hmalakna report a pe a, chung zingah chuan Government Saiha College, Siaha nên thawhhona thuthlung an ziah angin KVK-a Subject Matter Specialist te'n College zirlai naupangte an zirtir ṭhin a, zirlaite pawhin an hlawkpui êm avangin thawhhona thuthlung hi ziah chhunzawm zêl tum a ni, a ti.

KVK Siahaah hian Subject paruk a awm a, chungte chu - Agriculture Extension, Plant Protection, Horticulture, Animal Science, Home Science leh Agronomy a ni a. Vawiin Scientific Advisory Committee ṭhutkhawmah hian Subject Matter Specialist te hian kum 2025 - 2026-a hma an lâk dan power point hmangin an nei a, kum 2026 - 2026-a hmalakna kalpui an tum dan member-te hmaah an sawi a, zawhna an chhan bakah sawihona hun hman a ni a, siamrem ngaite siamrem anih hnuah lungrual taka pawmpui nghal a ni. Scientific Advisory Committee in rawtna a pawmpui hi ICAR - Agricultural Technology Application Research Institute (ATARI), Zone-VII, Umiam (Meghalaya) a thehluh tur niin anni lamin an pawm hnuah hmalakna tak tak kalpui ṭan a ni ang.

Vawiin hun hmannah hian Scientific Advisory Committee member-te an tel a, Pu Martin Zohmingliana, Deputy Director, Agriculture & Farmers Welfare in a telpui bawk a. Pi C. Rachel, SMS Plant protection-in lawmthu sawina neiin hun a khar.