Vawiin chawhnu dar 2:00Pm khan SDSC Secretary leh DIPRO ni bawk Pu N.Vabeiratlia Office chamber-ah SDSC te chuan LH. Beihneisa, Bronze Medalist, 1st Sub-Junior National Boxing Championship lawmpuina  a hun a hmang.

He lawmpuina hun hi Pu H. Vabeitha, Chairman SDSC chuan a kaihruai a, SDSC hruaitute bakah Siaha District a Sports Discipline hrang hranga hruaitute an tel. Pu FC. Minela, President, Siaha District Boxing Association (SiDBA) chuan tawngtaina hun hmangin; Pu N. Vabeiratlua, SDSC Secretary,   chuan thusawina leh lawmpuina Citation leh tangkafai Rs.2000/- hlanna hun a hmang.

Mizoram Journalist Association (MJA) aiawhin Pu V. Pawhla, President leh NSV Cable neitu ni bawk te; Pu Khusa Khaila, Honorary Secretary, Siaha District Football Association (SDFA) leh SDSC a Finance Secretary ni bawk te leh Pu FC. Minela, President SiDBA te chuan lawmpuina leh fuihna thu tha tak an sawi bawk.

Bronze Medalist LH. Beihneisa in Championship Tournament an khel chungchangah Report kimchang tak a pe a, hlim takin thingpui ruai tui tak nen he hun hi hman a ni.

1st Sub-Junior National Boxing Championship hi 1st – 8th July, 2019 khan Rohtak, Haryana ah khel a ni a, State hrang hrang atangin Sub-Junior Boxer tha an fuankhawm kim hle a, Team 33 atangin Boxer 326 zet an tel a ni. LH. Beihneisa hian First Round ah Manipur Boxer a hneh a, Second Round-ah Madhya Pradesh Boxer hnehin, Quarter Final ah Himachal Pradesh Boxer a hneh leh bawk. Semi Final-ah vanduaithlak takin Services Boxer tha zet chu Point khat (1) leka hneh lovin Bronze Medal-ah lungawi a tul ta a ni. 

LH. Beihneisa (kum 14) hi Meisavaih East, Siaha a khawsa niin, Pu LH. Vabei leh Pi S. Bervalin ta fapa a ni.  Naupang te a nih lai atangin SiDBA hnuaiah Boxing zirin a lo khel thin a, 37 Kgs below ah a khel thin. State Level ah Gold Medal pariat  leh Silver Medal pakhat (1) zet a la tawh a, National Level-ah chuan tun hi a vawikhat fehchhuahna niin; Bronze Medal a hnekchhuak  a ni.

LH. Beihneisa hi Inter-District leh State Level Boxing Championship (37 Kgs below) ah Defending Champion nilai a ni a, kum 2017 & 2018 khan State Level Boxing Championship-ah ‘Most Promising Boxer’ atan thlan a lo ni tawh bawk. 

LH. Beihneisa hian nikum  2018 khan Sports Authority of India (SAI) Aizawl a inzir tura thlan a ni a. Tunhnaia a chetthat avang hian India Camp a awm turin Tuipui 'D' Boxer nen Mizoram atangin thlan an ni. He Camp atang hian International Level Championship/Tournament-ah inlan thuai tura beisei a ni.