265/2026-2027

Dated Siaha, the April 23rd, 2026 : Vawiin khan Primary Health Centre, Tipa-ah ‘rualbanlote tan Identity Card siam runpui’ (assessment camp) neih a ni a, Zoram Medical College & Hospital leh District Hospital, Siaha-a doctor leh thawktu dangte an kal. Specialist Medical Doctor kalte hi - ENT, Medicine, Ophthalmology, Orthopaedics/PMR, Paediatrics, Psychiatry niin Clinical Psychologist, Audiologist leh Optometrist an tel bawk.

Vawiin hun hmannaah hian Siaha district chhung khaw hrang hrang aṭangin mi eng emaw zat an kal khawm a, uluk taka en niin rualbanlo certificate mi 180 (za sawmriat) pek chhuah an ni. Rualbanlote tán Aadhaar enrollment (new) leh siam ṭhat (correction) ngaite a thlawnin siamṭhat sak an ni bawk. 

Rualbanlote hian sawrkar aṭanga hamṭhatna dawng turin UDID Card (Rualbanlo ID) an neih zel a ngai tawh a. UDID Card siam tur hian an awmna District Hospital emaw Aizawl emaw an pan a ngai ṭhin a. UDID Card siam kawnga an harsatna sut kian anih theih nan leh anmahni puala hamṭhatna sawrkarin a duante an dawn ve ngei theih nan he UDID Assessment Camp hi kalpui a ni.

Assessment camp-hi Mizoram sawrkar hnuaia Social Welfare Department leh Health & Family Welfare Department ṭangkawpin an buatsaih a ni a, Siaha district-ah chuan Social Welfare Department-a thawktute hmalaknain Health & Family Welfare Department, Mara Chanô Py (MCHP), BDO Tipa leh PHC Tipa ṭanghoin neih a ni.