266/2026-2027

Kolasib, 24th April, 2026: Vawiin khan Kolasib DC Office-a thawktute chuan 'Kolasib District Fai Bul Tanna' atan Kolasib Bawrhsap Pisapui (DC Office) tihfai hnatlangpui an nei a. He faina hnatlangpui hawnna inkhawm tawi hi Additional Deputy Commissioner (ADC) Pi B. Malsawmtluangi chuan a kaihruai a ni.

He hunah hian Kolasib Deputy Commissioner Pu H. Dolianbuaia chuan thu sawiin, Kolasib chu Mizorama khaw fai ber nihna hauh tuma hma lak a nih thu leh, chu faina beihpui chu hmun dang atanga tan lovin anmahni ngeiin DC office atanga bul an tan thu a sawi a. Faina beihpui thlak hi thla thar May-ah chuan khawtlang huapa kalpui turin Village Council (VC) leh YMA te nen thawhho a ni dawn a, October thlaah chuan ngawrh taka hmalakna a kalpui a nih dawn thu a tarlang.

DC chuan faina chu nunpui a, kan thinlungah fai duhna rilru put a pawimawh zia sawiin, mahni office leh thawhna hmun theuhte vawng fai turin a chah .

Faina beihpui hnatlang hi SDO (Sadar) leh DUDO ni bawk Pu H. Lalramliana chuan a vailiam a. Hemi hnu hian DC Office-a thawktute hian nilengin DC Office chhung leh a vel tifaia hnatlangin hun an hmang nghal a ni.