2818/2023-2024

Dated Siaha 21st November 2023 : Vawiin chawhnu khan Siaha Officers' Club (SOC) leh PHE Department tangkawp chuan Association for Voluntary Blood Donation (AVBD) Siaha ten tangkai taka an hman turin khum thleh theih (folding bed) hlanna DMS Hall, District Hospital, Siaha ah an nei a. He hun hi Pu H. Vabeitha, President, SOC chuan a kaihruai a ni.

Pu K. Chhihrau, Executive Secretary, MADC leh Patron, SOC ni bawk chuan kalkhawmte hnena thusawina neiin, SOC ten thisen pe tur ten nuamsa leh hahdam zawka thisen an pek theihna tur atana tangkai tak 'Folding bed' pe tura ruahmanna feltak an lo duang chu lawmawm a ti a. India ramah thisen mammawhtuten harsatna tamtak an tawk thin tih tarlangin Mizoramah pawh thisen mamawh khawp hmuh a har chho hle tiin thisen pek lamah harhthar a tul hle a ti. Thalaite zingah thisen pe theilo tamtak an awm tawh a, a lung chhiat thlak hle a, thangthar lo awm leh zel tur ten thisen pe thei ngei tura hriselna vawng tha turin nu leh pa, kohhran leh NGO-ten tanlak a tul hle a ti bawk. India rama state dangte nen khaikhin chuan Mizoram chu kan ziaawm hle tih a tarlang a, kohhran, tlawmngai pawl leh zirlaiten thisen a thlawnin an pe fo thin a, hei hian nasa takin thisen mamawhtute a tanpui thin a, hetiang chin dan tha hi chhawmnung zel turin mitinin tan la thar se a duh thu a sawi a ni.

Pu K. Chhihrau chuan thisen pek chu nunna hlutak chhanna anih avangin mitin thisen pek lamah tan lak thar a tul hle a ti a. Thisen hi kum a lo tam tawh chuan pek mai a harsa thin a, pek theih hun hi mihring hrisel lai anih angai a , chuvangin pek theih hun laiah chuan pe fo thin turin uar zawka inzirtirna kalpui a ngai a ti. 'Thian chhan thih ngam' ti a hriat kan ni thin a, tunlaiah chuan sa leh ral do tur a awm tawh lo a, thian chhan thih ngam a kan chet theihna ber chu thisen pek hi a ni, a ti. Thisen mamawh khawpa damlo thei vek kan ni tih hi theihnghilh loh a tul a, midang thisen mamawh hun nei thei vek kan nih avangin, keimahni ngei pawhin midangte nunna hlutak chhanna turin thisen pek i uar sauh sauh ang u tiin kalkhawmte leh Siaha mipuite a sawm nghal bawk.

Pu Dingluaia, Superintendent of Police, Patron, SOC , Siaha pawhin thusawiin thisen pek chu thil ropui leh tlawmngaihna sang tak a ni tiin thisen pe turin mitinin mawhphurhna kan nei vek a ni, a ti a. Midangte tanpuitu ni tur leh thisen pek lama hmasawnna rahbi thar kai turin mahni theuha tan la thar turin a sawm a ni.

Dr. Lalnunziri, Sr. Chief Medical Officer chuan Siaha Officers' Club- ten nachang hriaa, thisen petuten tangkai taka an hman tura folding bed an pe chu lawmawm a tih thu a sawi a. Siaha Officers Club- te chu Siaha District- tan tangkai takin an lo luangchhuak tawh thin a, vawiina an thilpek chu a hlu zual hle a ni a ti. Pu Lalmaka Tluangneh, Secretary AVBD , Siaha chuan an pawl aiawh a thusawina neiin 'Blood Donation Camp' an neih naah tangkai takin vawiina SOC- te thilpek chu an hmang thin dawn tih tarlangin thinlung takin SOC chungah lawmthu a sawi bawk.

Pu R. Zohmingmawia, Finance Secretary, (SOC) chuan tawngtaina neiin hun a khar a. Siaha Officers Club- te hian Folding bed pathum hlan in, PHE Department hian Folding bed pakhat an hlan bawk a. Folding bed hi pakhat cheng 5329 man a ni.