3640/2023-2024

Dated Siaha 2nd February 2024 : Vawiin khan District Level Special Task Force for Awareness Campaign on Solid Waste Management-te chuan DC Mini Conference Room, Siahaah thutkhawmna an nei a, Pu Lalhmunsanga Hnamte District Bawrhsap leh Chairman, District Level Special Task Force for Awareness Campiagn on Solid Waste Management ni bawk chuan thutkhawm hi a kaihruai.

Pu Lalhmunsanga Hnamte chuan faina leh thianghlimna kawnga hmasawn turin mitin in mawhphurna an nei tiin midang kutah dah mai lova mahni theuhin hmasawn zawng a ke pen a tul a ti a. Bawlhhlawh paih kawnga fimkhur thar tur leh a paihna tur dik takah chauh bawlhlawh paih thin tur leh mahni in leh lo te enkawl fai tha turin Siaha mipuite a ngen a ni.

Vawiin thutkhawm ah hian Siaha District- in faina lama hmasawnna rahbi thar a neih theihna turin thil pawimawh tak tak sawiho a ni a. VC tinte chu khawtlang enkawltu nu leh pa ber an nih angin, mahni veng theuhah faina lam lo ngaipawimawh zel se tiin, ngenna pawh siam nawn leh nise an ti a. Veng tina VC-ten bawlhhlawh paih fimkhur tura inzirtirna video tawi siam a, Social media lama thehdarh turin hmalak ni se, NULM lamin a tul angin hma lo la se an ti, a ni. Lirthei neite chu bawlhlawh paih kawngah fimkhur zual se tiin 'pocket dustbin' an lirthei a dah vek a tul hle an ti a. District Transport lam ten 'Zero Tolerance' an hman hunah uluk takin lo enfiah thin se, passenger phur thin motor khalhtute pawhin an mi phurhte bawlhlawh paih kawnga fimkhur turin lo hrilh thin se an ti a, DTO chuan a tul angin hma lo la se an ti bawk.

Local Administration Department, MADC- ten ui khuahkhirna dan an kalpui mek chu tha an ti hle a. Mipuiten tha takin lo zawm se an duhthu sawiin, Committee chuan theihtawpin LAD, MADC hmalakna chu lo tawiawm zel ni se an ti a. Kohhran chu faina campaign neihna atana pawimawh leh tangkai tak ani tiin, team hrang hrangah insiamin kohhran ah a tam thei ang bera faina campaign- kalpui ni se an ti a ni. UD&PA hnuaia 'Public toilet' chu privatize thuai nise, pawl emaw mimal nena Memorandum of Agreement (MoA) a hma lama ziak thei turin hmalak nise an ti a ni.

School leh College- a faina inzirtirna kalpui chu a tul hle tiin, April thla atang chuan campaign tan theih ni se an ti a. MTP chu NGO lianber annih angin hman tangkai a tul tiin, MTP ten branch tin an tlawh hunah faina lam an sawi uar leh inzirtir theihna turin 'Banner' siam nise, NULM lamin banner siam chu lo buaipui se an ti a ni. Siaha khawpuia chengte tan hawi thawvenna tur 'public park' siam thuai chu a pawimawh hle an ti a, LAD, MADC lam ten 'concept paper' a hma lamin lo siam se, Rashtriya Gram Swaraj Abhiyan (RGSA) scheme- hnuaiah tihpuitlin ngei a nih theih nan a tul angin bawhzui nghal nise an ti. Sanitation Inspection Team- te chuan a tam thei ang berin endikna lo nei se, faina lama thawk thate hnenah lawmman pawh siamsak nise an ti bawk.

Vawiin thutkhawmah hian 'District Level Special Task Force for Awareness Campaign on Solid Waste Management' member- te an tel tha hle a ni.