1642/2023-2024

Dated Siaha 25th August 2023 : Vawiin khan Electoral Roll Observer Pi K. Lalrinzuali, IAS, Disaster Management & Rehabilitation Secretary nibawk chuan Siaha tlawhin, Election Official-te, political party leh tlawmngai pawl aiawhte DC Mini Conference Room-ah meeting a neihpui.

Pi K. Lalrinzuali chuan Mizoramah electoral roll leh inthlan kalpui dan a felfaiin, a thianghlim thawkhat hle tih sawiin, electoral roll felfai leh thianghlim zawk a awm theih nan tan lak zel a tul tak zet a ti a. Kumin hi MLA inthlan kum a nih avang leh ram dang aṭanga raltlan eng emaw zat Mizoramah an awm avangin roll revision-ah fimkhur a ṭul zual hle a, electoral roll ṭha, dik leh felfai tak nei turin roll-a chuang tur dik takte an chuan a, a chuang lo turte an chuan loh a pawimawh hle a ti. Electoral roll rin tlak a awm theih nan official-te chu fimkhur leh zual tura chahin, political party leh tlawmngai pawlte pawh theih tawp chhuaha official-te ṭanpui zel turin a sawm a ni. India khua leh tui diktak te chauhin vote an neiin an thlak thei tih tarlangin Pi K. Lalrinzuali chuan hmun thenkhatah India khua leh tui diktak ni lo te vote an neih theih na turin NGO leh VC/LC te hmalakpuina a awm thin tih tarlangin hemi kawnga fimkhur tur leh dik taka election official-te tawiawm turin NGO leh VC te chu a chah.

Electoral Roll Observer chuan role revision chu electoral roll-a inthun luh thar hun leh siam ṭhat ngai siam ṭhatna hun ṭha a nih thu sawiin, claims and Objections hunbi ruat ngaihpawimawh a tul hle tiin, draft role list-ah mahni hming a awm leh awm loh en chiang fo turin mipuite a chah bawk. Inthlan dawnah vote transfer a hluar hle thin tih sawiin Pi K. Lalrinzuali chuan NGO leh political party-te chu Election Official-te thawhpui tha turin a sawm ani. Siaha District-ah MLA bakah MDC thlan thin anih angin Roll pahnih a awm a, MLA chu Election Commission of India hnuaia inthlan thin niin MDC chu State Election Commission hnuaiah inthlan neih thin a ni a, heng Roll te hi a hran ve ve a siam a nih thin avangin Siaha mipuite chu E/Roll pahnih te hriatfin lo a uluk taka enfiah thin turin a chah. MLA inthlanpui lo awmtur pawh felfai leh thianghlim taka hmachhawn thei turin Official, BLO, NGO, political party leh Siaha mipuite a sawm nghal bawk.

Vawiina Electoral Roll Observer hova Special Summary Revision neih hi Pu Lalhmunsanga Hnamte, District Election Officer, chuan kaihruaiin kalkhawmte in hmelhriattirna leh lawmna a nei a. Pu Vanlalchhuanliana, Election Officer, chuan summary revision neih meka hma lakna tlangpui a sawifiah a, Electoral Roll felfai leh diktak a awm theih nana hmalak zel dan tur te sawi ho a ni bawk.

Special Summary Revision, 2023 kalpui mekah hian draft electoral roll atanga a lan dan in Siaha (ST) Assembly Constitency-ah vote nei Mipa-11238, hmeichhia- 12188 an vaiin vote nei mi-23426 awmin, Palak (ST) Assembly Constitency-ah vote nei mipa-9954, hmeichhia-10189, an vaiin mi-20143 awmin Siaha District pumpuiah vote nei mi 43569 an awm mek a ni. Electoral roll-a inziah luh thar duh tan emaw, electoral roll-a chuang tawh paih, insawn leh siam ṭhat duhte tan August ni 31, 2023 thleng hun hawn a ni a, October ni 4, 2023-ah final electoral roll chu tar chhuah tura ruahman a ni.

Pu Lalhmunsanga Hnamte, District Election Officer (DEO) leh Bawrhsap ni bawk chuan lawmthu sawina neiin hun a khar a ni.