95/2024-2025 

Dated Siaha 8th April, 2024: Vawiin chawhnu khan 1- Mizoram Parliamentary Constituency- a General Observer, Dr. Nipun Vinayak (IAS)  hovin Siaha District-a Assembly Segment pahnih, 39- Saiha leh 40- Palak, a Nodal Officer- te chuan District Rural Resource Centre, Project Director Office- ah thutkhawmna an nei a. Pu V.L. Hruaizela Khiangte, Asst. Returning Officer leh District Election Officer nibawk chuan thutkhawm hi kaihruaiin, Nodal Officer-te hmelhriattirna hun a nei nghal a ni.

General Observer Dr. Nipun Vinayak, chuan Nodal Officer- te hnena lawmthu sawina a nei hmasa a.Inthlanna felfai leh thianghlim tak awm turin theihtawp chhuah a tul tiin thahnem ngai taka hnathawk turin a chah a. Election Commission of   India (ECI)  duhdan ang thlapa inthlan kalpui turin an mawhphurhna theuh hlen turin a ngen a ni. A bik takin  'Nodal Officer' zinga election vawikhatna hmachhawn tur te chu  an tan hun tha  a ni tih hriaa, mahni inrintawkna nen inthlan hmachhawn turin a fuih bawk.

Dr. Nipun Vinayak chuan MP ( LS) inthlanpui lo awm turah thil tihsual a awm thianglo tiin Nodal Officer-  tinte chu an hna theuh uluk taka thawk turin a ti a. Thawhhona tha a pawimawh tak zet tih tarlangin, Nodal Officer zawng zawngte chu mahni hna chanpual bik chauh duhtawk mai lo va, midangte nena lungrual taka thawk tur leh intanpui tawn turin a fuih a. Thil pakhat lek diklo avangin harsatna lian zawk a thleng thei tih hre reng tur leh a tul dan ang zela thawkho turin a chah a ni.

Pu V.L. Hruaizela Khiangte, Asst. Returning Officer, 39- Saiha leh 40-Palak Assembly Segment chuan MP election atana hmalakna hrang hrangte a tarlang a. Election duty turte tan District Master Trainner ten thahnem ngai takin training an kalpui mek tih a sawi a.  Siaha Distrctict- ah Polling Station -81  awm mekin, All women Manage Polling Station- 4 a awm bawk a ti . Sector Magistrate -18 awmin , P-2 Polling Station awm lo in, Polling Station zawng zawng chu P-1 polling station an ni vek tawh a ti. EVM Strong Room pahnih awm mekin Counting Hall tur atan ruahmanna kalpui mek a ni, a ti a. Siaha District - a NGO te nen thawhhona tha tak neih a nih thu tarlangin, mipui tam zawkin vote an thlak theihna turin SVEEP chu chak taka kalpui a ni, a ti bawk.

Pu K.L. Vulmawia, Superintendant of Police, Siaha chuan ralmuang taka inthlan kalpui turin Dan leh thupek kenkawh kawngah Mizoram Police ten chak takin hma an la mek zel a ti a. Siaha District- a Police Outpost- te chu uluk zawka dan leh thupek kengkawh tura hriattir tawh an ni a ti. Vote thlak ni (Poll day ) ah chuan Polling Station tinah venhimna thawk tur mi pahnih dah an ni dawn a ti a. EVM Strong Room-ah venhimna khauh tak kalpui mek a ni tih tarlangin, Counting Hall- ah pawh venhimna tha tak pek a ni bawk ang tiin, Central Armed Police Force (CAPF) company - 1  lo thleng tur pawh an duty  na tur hmun siamfel vek tawh a ni, a ti.

Vawiin thutkhawmah hian 'Nodal Officer'  zawng zawng ten an hna chanpual theuh  leh an hmalakna bakah hmabak an neih ang angte chu General Observer hnena sawifiahna hun an nei a. Thutkhawm zawhfel hnu hian Dr. Nipun Nayak, General Observer for 1- Mizoram Parliamentary Constituency chuan EVM strong room, Counting Hall leh CAPF - te riahna tur room a enfiah nghal bawk.