4060/2023-2024

Dated Siaha 6th March 2024: Vawiin chawhma dar 11 khan District Legal Services Authority bultumin, Forest Hall, MADC- ah 'International Women's Day' hman a ni a, Pi Lalhriatpuii, Secretary, District Legal Services Authority chu Resource Person niin hun a hmanpui.

Pi Lalhriatpuii chuan 'International Women's Day ' a duhsakna a chang chu lawmawm tiin, kalkhawmte nen hun tha tak an hmanho a beisei tih a sawi a. Dan hriatloh hi himna a ni lo a, kan nun a pawimawh chin chu kan hriat ve a tul hle a ni, a ti. District Legal Serives Authority chuan inzirtirna lian tak tak pathum - Legal Awareness Campaign, Legal Aid Clinic leh Lok Adalat- te a kalpui thin tih a tarlang a. Mipuiten Dan an hriatchian chu ngaihpawimawh a nih thu sawiin , a theih ang angin 'Legal Awareness Campaign' kalpui thin a ni, a ti a. Mi tam takin Dan an hriatchian phahin dan hmangin hma an la fo thin a, a lawmawm hle a ni, a ti. 'Legal Aid Clinic' hnuaiah ukil te rawn theih reng an ni tih sawiin Pi Lalhriatpuii chuan hreh lo a ukil te rawn thin turin a chah a. Sum leh pai sen ngai lo a thubuai remna tha tak Lok Adalat- chu tangkai zawka chhawr a nih theih nan tan i la thar an u tiin a sawm a. A bik takin 'domestic violence' - kut inthlak, tawngkam chhia a invo leh a dangah te thubuai thehluh theih reng a ni, a ti a. Lok Adalat- hi sum leh pai sen ngai lo a nih piah lamah 'councelling' tha tak a pek thin a nih avangin a tangkaihle a ni a ti. Venhmina tha tak pek tel a nih bawk avangin pan hrehlo turin kalkhawmte a sawm a, intihluihna awm lo in, thubuaineite remtihna thlap a thutlukna leh remna siam thin a nih avangin 'Lok Adalat' hi a hluin a tangkai em em a ni, a ti.

Pi Lalhriatpuii chuan Court kal hi thil nuamlo tak a ni, amaherawh chu thil tha zawk thleng turin kan mawhphurhnaah kan ngaih ve a tul a ti a . Serive provider- ten a tul apiang tiin, Court- ah an an kalpui thei a, Siahaah chuan MCHP Branch tin Secretary- te hi 'service provider' an ni a, pan theih reng an ni a ti. Juvenile Justice Act- hnuaiah Juvenile Justice Board- tha tak a awm a, Observation Home- ah naupang kum 18 hnuailam thil tisualte chu enkawl thin an ni, a ti a. Ei leh in bakah lehkha zirtirna thlengin pek an ni thin a, councelling- tha tak pe a enkawl an nih bawk avaning, naupang thilsual lo titawhte chu mi tha leh fel tak dinhmunah a siam thin a ti bawk.

Ramri hrula awm kan nih angin, damdawi bakah silai leh puak thei thil tawlhruk a tam hle tiin Pi Lalhriatpuii chuan, MCHP, MHIP leh LWA member- te chu fimkhur zual turin a chah a. Kan motor- a kan phur emaw kan chuanna motor- ah hetiang sawrkar phalloh hi man palh a nih chuan jail thleng kan tang ve thei a, chuvangin a theih chin chinah i fimkjur ang u a ti a. A bik takin Sum puk hi hmeichhiaten kan uar hle a, sum leh pai inpuk, pek let theih loh vangin harsatna tam tak kan tawk thin a, hemi kawngah hian fimkhur a tul hle a ti a. Mahni hriatchian leh rintlak tak tak an nih loh chuan pawisa puk tir loh a him ber tiin, a theih chin chinah ziak a chhinchhiah thlap thin turin a chah a. Sum leh pai bikah court- a kan kal dawn chuan kum thum chhung ngei ngeiin kal a ngai thin tiin, thuhretu tha tak neih pawh a tulin a pawimawh hle a ti bawk.

Pi Lalhriatpuii chuan thurochhiah felfai tak neih loh vangin mi tam takin harsatna an tawk thin tih tarlangin , buaina nasa zawk a awm lohna turin chhungkuaah thurochhiah felfai tak siam a, hriatpuitu fel tak neih hi a finthlak hle a ti a. Hei hian in leh lo bakah ro khawm dawnah nasa takin min puih thei dawn tiin ngaipawimawh turin a chah a. Vawiina an thil zir, ngaihtlak leh hriat ang angte chu anmahni chhungkua piah lamah midangte hnena puangzartu ni theuh turin a sawm bawk.

Pi P. Chaki, President, MCHP, Headquarters, Siaha, chuan vawiin inkhawm hi a kaihruai a. ' Hmeichhiate Ni' khawvel pumah uar leh urhsun taka hman a ni a, he niah hian hmeichhiate kan hlutzia hre thar lehin inhrilh thar leh ang u tiin a sawm a. Mizoramah hmeichhiaten hna zahawm leh tha tak tak kan thawk a, kohhran leh khawtlangah te, infiamna kawngah te pawh hmeichhia ten hma kan sawn nasa em em a, a lawmawm hle a, Siaha District- a hmeichhiate pawhin tan la thar leh ila, hmasawnna duhawm tak nei turin ke i pen ang u tiin a sawm a ni.

Vawiin 'Hmeichhiate Ni' hmannaah hian Pi H. Lalawii, President, MHIP, Sub- Headquarters, Siaha, in tawngtiana in hun a hawng a, Pi H. Z oramnghingi, President, LWA, Sub- Headquarters, Siaha, in lawmthu sawina neiin hun a khar.

Internations Women's Day-hi March ni - 8 ah khawvel pumah hman thin a ni a, kumin thupui atan hian "Inspire Inclusion" tih a ni a, Siahaa kut lian leh pawimawh tak 'Lyuva Khutla' hman a nih dawn avangin vawiinah 'International Women's Day' hi hman a ni.