4374/2023-2024

Dated Siaha 28th March 2024 : Member of Parliament (LS) inthlanpui lo awm tur atana inbuatsaihna kal zelah vawiin khan Siaha District Media Certification & Monitoring Committee (MCMC) chu an Chairman Pu V.L. Hruaizela Khiangte, District Election Officer, kaihruaiin DC Mini Conference Room-ah an thukhawm.

Pu V.L. Hruaizela Khiangte chuan 'Democracy' ramah mipuiten an aiawha roreltu tur an thlang thin a, mipuiten dik leh thianghlim taka vote an thlak theih nan ruahmanna tha siamsak a tul hle a ti . Tun lai khawvelah Social Media hmang an tam thu tarlangin, political party- te tan pawh mipuite hnena an inzawrhna hmun tangkai tak a ni,a ti a. Social media bakah Cable TV leh print media lamah pawh inbeihna a tam dawn hle tiin, party miten ECI inkaihhruaina an bawhchhiat lohna turin hmalak a tul hle a ti. Candidate hming leh hamthatna tura advertisement siam reng rengah te chuan MCMC- hnenah chhuah phalna ( pre- certification ) dil hmasak a tul tih party lam ten lo hria se a duh thu a tarlang a. Phalna la hmasa lo a 'advertisement' siam leh chhuah reng rengah chuan MCMC ten danin a phal ang a hma lo la zel turin a chah bawk.

Pu V.L. Hruaizela Khiangte chuan inthlanpui lo awm turah media hmansualna a awm lohna turin MCMC ten hma an la reng tih a sawi a. MCMC in kawng engkimah an veng seng lo mai thei a, mipuite leh party lam te theihtawp chhuahpui turin a sawm a. Inhlanna felfai tak neih a nih theih nan mitin an pawimawh tih sawiin, mipuiten an duhthusam ang ngei a vote an thlak theih nan thawhhona tha a awm a tul hle tih tarlangin, political party hrang hrang leh Siaha district mipuiten thahnem ngai taka election official- te lo thawhpui turin a sawm nghal a ni.

Pu Zonunchama Ralte, Member Secretary, MCMC chuan report tawi pekna a nei a. Election puan ni atang khan 'Paid news' a awm leh awm loh te enfiah tan nghal niin, 'Press clipping' pawh tih nghal a ni, a ti a. Report hi Joint CEO, Aizawlah thawn phei nghal zel a ni a, a copy chu DEO leh Accounting Team -lamah pek a ni bawk a ti. Cable TV leh Social media platform hrang hrangah 'political advertisement' a awm em tih pawh enfiah mek zel a ni, a ti a. Election Commission of India in inkaihhruaina a siam zulzui zelin Media Certification & Monitoring Committee (MCMC) ten chuan hma an lak zel tur thu a sawi bawk.

Vawiin Media Certification & Monitoring Committee (MCMC) thutkhawm ah hian memeber- te an tel kim tha hle a, MP (LS) inthlanpui lo awm turah theihtawp chhuaha hma la zel turin ro an rel a ni.

Pu V.L. Hruaizela Khiangte, District Election Officer leh Chairman, Siaha District MCMC nibawk chuan lawmthu sawina neiin thutkhawm hi a khar a ni.