3582/2023-2024

Dated Siaha 31st January 2024 : Vawiin chawhma dar 11 khan India Republic Day vawi 75-na hman zawh tak thlirletna DC Mini Conference Room-ah neih a ni a, Pu Lalhmunsanga Hnamte, Deputy Commissioner, Siaha chuan thutkhawm hi a kaihruai.

Pu Lalhmunsanga Hnamte chuan India khua leh tuite tana ni pawimawh ber pakhat Republic Day vawi 75-na tluang leh hlawhtling taka hman a ni chu lawmawm a tih thu a sawi a. Republic Day hlawhtling taka hman a nih theih nana rilru leh tha thahnem ngai taka thawhtute chuan fak an phu hle a ni, a ti. Department hrang hrangten an chanpual hna an neih ang angte thahnem ngai takin an thawk a, thawhhona tha tak hnuaiah hlawhtling takin 'Republic Day' lawmna neih a ni tiin Department aiawh lo kalte chungah lawmthu a sawi a. A sawmna ngaihpawimawh a 20th Battalion Assam Riffles-ten an hmanrua leh silai neih that tak takte mipui entheih tura an lo pho chhuak chu lawmawm a tih thu a sawi a ni.

Pu Lalhmunsanga Hnamte chuan kan hma lawkah 'Mizoram State Day' leh 'Chapchar Kut' lawm a ni leh dawn a, Mizorama chengte tan ni pawimawh tak tak a nih avangin hlawhtling taka hman a tul hle a ti a. Sawrkar Department- hrang hrangte pawh tihtur bik chanpual inpek leh a ngai dawn a, chung hunah pawh thahnem ngai taka an hna chanpual neih ang angte lo tihlawhtling leh fo thin turin a ngen bawk.

Pi B. Malsawmtluangi, SDO, Sadar chuan 'Republic Day 2024' lawmna atan a sum leh pai hman dan tlangpui report pekna a nei a. Sum leh pai hmuh zawng zawng chu cheng 323200 niin, heta tang hian cheng 323165 chu Republic Day hman nan hian sen ral niin, cheng 35 a chuang a ni, a ti.

Vawiin thutkhawmah hian changtluk leh felfai zawka 'Republic Day' leh 'Independence Day' - lawm dan tur sawihona neih nghal a ni a. Parade Contingent- tam zawk tel tura hmalak nise, Parade contingent-te tana refreshment- ni khatah mi pakhat tana cheng 20 tih chu ennawn leh nise an ti a . Republic Day leh Independence Day- lawmna hmun pawh en that ni se an ti, a ni. VIP at Home Program siam thin chuan ngaihpawimawh a hlawh tawk lo hle tiin, VIP at Home- chu ngaihpawimawh zawk a nih theih nan Department- tin a hotuten hma lo la se an ti bawk.

Vawiin thutkhawmah hian Siaha District chhunga sawrkar Department hotute an tel kim tha hle a. Pu Lalhmunsanga Hnamte, Deputy Commissioner, Siaha chuan 'Republic Day 2024' Thlirletna neih a lokal zawng zawngte chungah lawmthu sawiin thutkhawm hi a khar a ni.