3583/2023-2024

PRESS NOTE

1) Mizoram Education Reforms Committee : Sawrkar chuan Mizoram kalphung siam ṭha turin high level committee, Mizoram Education Reforms Committee din a tum a. He committee hian elementary education chauh ni lovin higher education pawh a huam dawn a. School Education/H&TE Deptt. Minister Chairman-na hnuaiah  Working Chairman ruat a ni ang a, committee tana hman tur terms of reference (ToR) chu Minister leh Working Chairman te kaihhruaina hnuaiah duan a ni ang.

2) Education Consultant ruat : Zirna kawng hrang hranga thurawn lakna tur leh Mizoram zirna kal phung zir bingna leh ruahmanna (research & planning) buaipui turin Education Consultant ruat tum a ni a. Office leh a thawhpui tur ruahman sak a ni ang a, kut hah man (honorarium) pawh thla bi-a ruahman sak tum a ni. ToR chu Directorate, SED-in a ruahman ang.

3) School Adoption : School Education Minister-in a AC bialah Govt. Primary School pakhat chu term hmasa aṭangin a adopt a. Hei hi MLA LADS sumin a theih anga ṭanpuiin khawtlang leh Branch YMA nen an enkawl a. He kal dan phung leh central sawrkar hnuaia Vidyanjali Scheme zulin MLA tinte chu an bial ṭheuha school adopt ve tur leh khawtlanga NGO-te nena ṭangruala chung school-te enkawl theih dan tur ruahman tum a ni a. School adoption module lo duang turin sawrkar official aṭangin working group pawh ruat tawh an ni.

4) HSLC-a tiṭhate UPSC exam hmachhawn tura buatsaih : Sawrkar chuan HSLC examination-a a tiṭha zual zirlai sawmnga (50) aṭangin zirlai sawmhnih (20) thlan chhuah a, uluk bika UPSC exam atana kaihhruai ṭha a ti a. Hemi kalpui dan tur scheme lo buaipui turin sawrkar official a ruat tawh a ni.

5) SEDP hnuaia teaching leh non-teaching staff : SEDP hnuaia mi 1000 chuang, teaching leh non-teaching staff rawih mekte chu March ni 31, 2024 thlenga thawk tura lak an ni a. SEDP a lo tawp tak avangin heng teaching leh non-teaching staff te hi rawih an nih hun chhung bak chu pawh seisak an rem dawn lo a. Elementary leh secondary school-a teaching leh non-teaching staff mamawh dan Directorate of School Education-in an report angin post hnawh khah ṭul hnawh khah vat a ngai dawn a. The Mizoram Direct Recruitment (Conduct of Examination) Guidelines, 2018 hmangin post hnawh khah ṭul hnawh khat tura hma lak mek a ni.

6) SEDP hnuaia lak ai kal chungchang : SEDP hnuaia teaching leh non-teaching staff atana lak tam takte chuan ai kal an la tih hriat a ni a. Heng mite hi an hnathawhna tur hmuna an awm ṭhat loh avangin anmahni bank account-ah ni lovin, ai kala an chhawr, hna thawk tak tak zawkte bank account-ah an kut hah man (honorarium) hi thunsak tum a ni. LDC leh Group D lo bang tawhte post lo hnawh khat lailawk turin Headmaster ṭheuhte kutah thuneihna pek a ni bawk.

7) Ai kal la chungchang: School Education Department hnuaia teaching leh non-teaching staff ai kal late list chu DP&AR (ARW) hnenah theh luh a ni tawh a. An dinhmun tur chu DP&AR thu ngaihchan a ni.

8) Random examination : Academic year tharah National Education Policy, 2020 guidelines angin elementary school (Pawl III, V & VIII)-ah random examination neih tum a ni a. Hemi tur hian school zawng zawng chu lo inpuahchah tur niin thlan chhuah bik school-ah (20:1 ratio) exam hi kalpui tum a ni. Heng exam hi SCERT leh Samagra Shiksha-in an buaipui ang.

9) School syllabus leh question pattern ennawn a siamthat : National Curriculum Framework lo chhuak thar tur hmangin elementary level syllabus chu siamṭhat tum a ni a. Board exam question standard chu zirchian (research) tum niin zirlaiten a bul thum man (basic & conceptual clarity) an neih theih nan leh chîk taka chhut thiamna leh ngaihtuah dan thar (critical & creative thinking skill) an neih theih nan syllabus leh question pattern siamṭhat tum a ni.

10) Centre of Excellence : Aizawl District leh Mamit District-a DIET-te chu Centre of Excellence-a hlan kai tum a ni a. Hemi atan hian ruahmanna lo siam turin SCERT chu ruat a ni.

11) Mizoram Education Act leh rules/regulations dang ennawn : Right to Free and Compulsory Education Act, 2009 leh National Education Policy, 2020 milin School Education Department inkaihhruaina dan hrang hrang ennawn a, a ṭul ang leh tunlai mila her rem tura hmalak tum a ni.

12) Zirtirtu transfer leh posting : Sawrkar chuan zirtirtu indaih lohna siam ṭha turin zirtirtu thawk lai mek sem rual ṭul a ti a. Zirtirtu transfer leh posting hi Mizoram Education (Transfer and Posting of School Teachers) Rules, 2006 leh chumi dan kum 2020-a siamṭhat hmangin kalpui ṭhin a ni a. He dan hman laia siamṭhat ngaite lo zirchiang turin sawrkar official ruat an ni a; an zirchianna report hi February ni 2, 2024 hmaa thehlut tura beisei an ni a. He an zirchianna hi Council of Ministers ṭhutkhawm hmasak bera sawiho tura ruahman a ni.

13) School hrang hrang upgrade : Sawrkar kal chhuak ta-in school hrang hrang a lo upgrade tawh chu tun dinhmunah chuan an status ngaia la awm phawt tura tih an ni a. Heng school dinhmun tak tak hi zirchian a nih hnuah, tehfung awmte hmanga upgrade ngaite chu upgrade tura hma lak a ni dawn chauh a. DP&AR leh Finance Department rawn chungin hei hi mumal taka kalpui a ni ang.