3673/2023-2024

Dated Siaha 6th February 2024 : Tukin zing dar 7 khan 'Road Safety Month 2024' hawnna inkhawm chu, Bazar Traffic Point, Siaha ah neih a ni a. Pi Lalnunmawii Addl DC chu khuallian niin Pu Ngurthansanga, District Transport Officer chuan inkhawm hi a kaihruai.

Pi Lalnunmawii chuan 'Road Safety Month' chu mipui leh lirthei khalhtute tana buatsaih a nih ang taka hlawk taka hman a nih theih nan Siaha mipui leh lirthei khalhtute chuan ngaipawimawh turin a chah a. A tirah 'Road Safety Week' hman a ni thin a, tunah chuan karkhat chauh ni lo a thlakhat chhung hman a ngaita hian hmasawn leh tan lak nasat a ngaih zia a tichiang hle a ni, a ti. India ram chu khawvela lirthei chesual za zel a 11 lai thlen thinna ram a ni a, heihian lirthei khalhtuten fimkhur an ngaih zia a ti chiang hle a ti. Mizoramah ngei pawh lirthei khalhtute fimkhur tawk loh avangin thihna hial a thleng nasa hle a, kum 2022 chhug pawh khan lirthei chetsualna vawi 133 lai a thleng a ni, a ti. Kum 2022 ah khan lirthei tlanchak vanga accident thlengah nunna 57 chan niin, rui chunga motor khalh avaning mi 13 laiin nunna an lo chan hial a ni, a ti.

Pi Lalnunmawii chuan Siaha district- ah motor -a pung chak hle a, driving license pekchhuah pawh a tam sawt hle a ti a. Mi tam takin driving license neih an duhtawk thin a, heihian chetsualna a tlen fo tiin, driving license kan neih hian mawhphurhna lian tak kan nei nghal tih hriatchian a tul hle a ti. Nunna hi a hlu em em a, a petheitu nih loh pawhin a laksaktu ni lo tura fimkhur turin lirthei khalhtute a chah a ni. Chetsualna tam ber chu rui chunga motor khalh leh hmanhmawh taka motor khalh vang a ni tiin, rui chunga motor khalh lo tur leh hmanhmawh taka lirthei khalh lo turin siaha mipuite a ngen a. Traffic lamin dan an siam ang angte zawmthat chu chetsualna laka invenna pawimawh tak a ni tiin, pawisa chawi hlauh vang mai lo in midangte himna ngaituah vang zawka motor khalh fimkhur a pawimawh hle a ti. In satuten bungrua dah kawngah fimkhur a tul hle a ti a, kawngpui leh a sir a insakna bungrua dah mai ching an tam hle a, heihian lirthei vei vahna a ti buaiin chetsualna a thlen fo a, kawngpui leh a sir vela bungrua dah lo turin mipuite a chah bawk.

Dan kengkawhtute pawhin mawhphurhna sang tak an nei nia a hriat thu sawiin Pi Lalnunmawii chuan tawngkam mawi leh hawihhawm taka mipuite dawr thin a tul hle a ti a. Dan kengkawhtute chu mipuite tana rawngbawltu an nihna hre reng se a duh thu a tarlang a, khauh taka kal a ngaih hunah pawh danin a phal chinah zel kal se a duh thu a sawi. Dan anga hmalak a nih dawn pawhin, dan an bawhchhiatna lai chu tawngkam tha taka a bawhchhetute hrilhhriat hmasak thin a pawimawh hle a ti. Dan zawm tha tur chuan mipuiten dan an hriatchian a tul tak zet tiin, mipuite hnenah Traffic dan in zirtirna leh hrilhhriatna (awareness) pawh a tam thei ang bera kalpui a tul hle a ti a. Mipuite hnena thleng phak inzitirna pek kawngah NGO- te an pawimawh hle tiin NGO- te pawhin theihtawp lo chhuah pui thin turin a sawm a. 'Road Safety Month 2024' chu Siaha mipuite leh lirthei khalhtuten hlawk taka an hman tangkai theih nan duhsakna a hlan nghal a ni.

Pu S. Pakhai, DTO, MADC pawhin thusawina tawi neiin, Siaha kawngpui a chep sawt hle a, Garrage nei mumallo te chuan lirthei nei lo ngam se a duh thu a tarlang a. Parking area -ngaihpawimawh a tul hle a, lirthei dah phallohna hmuna lirthei lo dah mai ching an tam chu pawi a tih thu sawiin, Parking area- ah chauh lirthei dah thin turin motor khalhtute a chah a. A bik takin ke hnih nei khalhtute zingah helmet khum ngai pawimawhlo an tam zual hle a, khauh zawka hmalak a tul takzet tiin, helmet khum tha turin two wheeler khalhtute a chah. Chetsualna tamzawk pumpelh a nih theih nan lirthei khalhtute leh mipuiten mawhphurna an nei theuh tiin, mitinin Traffic dan zawm tha turin a sawm a ni.

Pu Ngurthansanga, DTO chuan 'Road Safety Month 2024' atana thutiam chhiar chhuahna a kaihruai a, Pu Lalrinliana Pachuau, MVI chuan lawmthu sawina neiin hun a khar. 'Road Safety Month 2024' hi Mizoram State Road Safety Council- te buatsaih a ni a, February ni-1 atanga February ni-29 chhung hman tur a ni. Kumin Road Safety Month atan hian thupuiah ' I him theih nan Traffic Rules- te zawm thin ang che' tih thlan a ni.