3672/2023-2024

5th February, 2024 : Vawiin  Khan Champhai District Education Conference Hall ah Road Safety Month  February thla chhung awh tur chu khuallian Pu.M. Misael Additional DC, Champhai chuan a hawng.

Khuallian Pu.M. Misael Additional DC thusawiin mamawhna avangin lirthei nei kan pung zel a, a bikin two wheeler registration a pung chak hle a.  Road safety month-in a tum ber, fimkhur tura inzirtirna chu lirthei khalhtute rilruah thar se a duh thu a sawi a.

Motor Vehicle Act ennawn tharah a hremna a na tawh hle a. Sorkar leh dan kengkawhtute duh ber chu dan zawm se tih hi a ni a, hemi kawngah hian kalkhawmte chu dan zawm tur te, document tul ang nei ngei ngei turin a chah a. Kan thupui 'I him theih nan Traffic Rules te zawm thin ang che” tih hi ngai pawimawh a, driving manner tha vawng turin a sawm bawk.

Khuallian chuan thalaite vaihlo leh ruihhlo laka an fihlim a tul tih sawiin, ruihhlo phei chuan kan thalaite a suat nasa hle a. Thalaite chu an thil tum tihlawhtling thei turin ruihhlo lakah ka fihlim tur a ni, a ti a, sorkar hnalak kawngah Champhai District atanga tling an tlem lutuk chu zirna lamah tanlak a tul a. Kan ngaihsan zawng kan thlak a, kan nun kaihhruaitu tur uluk taka kan thlan a ngai a ni, tiin a sawi.

Hawnna inkhawm hi Dr. Manesia Khaimeichho, DTO Champhai chuan a kaihruaiin , Road Safety chungchanga mipuiten kan hriat tur pawimawh Pu Dennis Vanlallura, Dy. SP, Pu R. Lalhruaitluanga MVI leh Pu T. Lalnunsanga, Vice President, SYMA te hnen atangin thusawi ngaihthlak a ni ve bawk.