3671/2023-2024

5th February, 2024 : Vawiin khan Fire Prevention Week (Kangmei Ven Hapta) February Ni 5th-10th, 2024 thleng hman tur DIET Campus Zotlang, Champhai ah Pu. M. Misael Additional DC, Champhai chuan a hawng.

Khullian Pu M. Misael Additional DC chuan 'Thapui Thawhin Kangmei Chhuaktur I Veng Ang U' tih thupui hmangin kangmei ven hapta hman tur chu a hawng a. Khua a lo thal leh ta a, keimahni, kan in leh lo, bungrua, nungchha leh ramngaw kangmei laka kan him tlan theih nan kan nitin khawsak phungah kangmei tichhuak lo tura kan fimkhur angai hle ani. Kangmei chhuak hi kan fimkhur tawk lo leh kan inthlahdah avangin a chhuak fo thin a. Mizoram hmun hrang hrang ah kangmei chhuak avanga chhiatna thleng hriat tur a awm leh ta zeuh zeuh mai a, kangmei vanga thing leh mau, nungchate a chereuh nasatzia leh boruak nasa taka a bawlhhlawh bakah kan nitin mamawh tuihna te nitin a kiam thin thu sawiin, ramngaw siam hi thil hautak tak hun leh tha sum leh pai tam tak senral a ngaih thin avangin thing leh mau kan neihsa te hi duat taka enkawl a ngai a, ramngaw awm sa humhalh nan kangmei ven kawngah thapui thawha kangmei chhuak tur ven a ngaih thu a sawi a. Forest Survey of India in a tarlan danin Mizoramah ramngaw thaa chhiar tlak kan ram zau zawnga atang tehin za ah sawmthum (30%) bak kan nei tawh lo ani a ti. Tlang ram lo neih kan la bansan theih lo avang leh mipui za a sawm ruk(60%) chu lo neia eizawng kan la nih avangin lo kan hal hmain mei lam tha taka sial a pawimawh hle a. Sawrkar thu chhuak ang leh Committee in a rel angin Champhai District ah pawh 13th March, 2024 hma a lo hal zawh vek turin ruahmanna siam a ni a. Tin, State Level Committee-in hmunphiah chinna tur atana lo hal thei hun hi 31st March, 2024 thleng a ruahhman chu zawm theuh tur a chah a ni. Champhai District mipuite chuan kangmei chhuak tur ven hi kan thlawhhma theuh ani tih hriaa sawrkar leh tlawmngai pawlte tih tura ngai mai lovin mimal pawl leh chhungkua ang pawhin zirtirna uar zawk a kalpui a tul thu a sawi bawk.

He hunah hian Pu Lalduhthlana, DFO Champhai & Member Secretary, District Level Fire Prevention Committee chuan kum hmasa lama kangmei chungchang a Champhai District dinhmun sawiin Kangmei hluar hun thal lai chu nungchate inthlahpun hun lai anih avangin nungchate suat thei kangmei ti chhuak lo tura fimkhur turin mipuite a chah a. Nikumah Champhai District chhungah lo atan ram hmun 3394 hectare(2019)vah a ni a, Ram kang kaihhnawihah FIR 6 thehluh anih thu leh thiam loh chantir anih thu leh ram hmun sawmnga (50) hectare 244 chuang a kangral thu a sawi bawk.

Pu F.Lalchhandama, Station Officer, Fire & Emergency Services, Champhai chuan kangmei chhuah chhan leh thelh mih kawnga hmalak dan tur zirtirna a nei a ni.

Vawiina Kangmei Ven Hapta inkhawmah hian Sawrkar Department hotute, Govt. Champhai College ECO Club, DIET zirlaite, Champhai Nature Conservancy, VC leh tlawmngai pawl ai awhte an tel a ni.

Pi Vanlalruati Principal DIET, Champhai chuan Kangmei Ven Hapta chu kaihruaiin . Upa. K Lalrintluanga President MUP Sub Headquarters, Champhai kaihhruaina in mipui kal khawmte chuan ram tikang lo tur leh ramngaw leh nungchate humhalh tura thutiam lak ani a.

Pu Lalzahawma Varte, Asst Secretary Sub- Headquarters YMA Champhaiin lawmthu sawiin hun a khar a ni.