3670/2023-2024

Hnahthial the 5th February 2024: South Tuipui Bialtu MLA Pu Jeje Lalpekhlua chuan vawiin khan Hnahthial District-a Department hotute kawmin inhmelhriatirna a neihpui. He hun hi Addl DC Pu Lalvenhima chuan kaihruaiin Hnahthial District Superintendent of Police Pu Shivendu Bhusan, IPS leh District pisa hotute an tel a ni.

Vawiin Inkawmhona-ah hian Bialtu MLA Pu Jeje Lalpekhlua chuan kalkhawmte chu chibai bukin head of office te nen inkawmna hun tha tak a nei thei chu lawmawm a tih thu a sawi. Bialtu MLA chuan ram in hma a sawn theihna turin hmachhawp tam tak duan a ni a ti a, Hnahthial District chhunga Head of Office te chu District tana hmasawnna tluan tling (Sustainable Development) thlen thei ngaihtuahpui turin a ngen nghal bawk.

Chief Minister in a ngaih pawimawh em em; mahni bank account-a sawrkar sum dah chungchangah district head of office te chu fihlim turin a sawm a, hun vawn dik a pawimawh hle ti bawkin office kai hun leh ban hun sawrkar in a siam ngaipawimawh a, biometric attendance kalpui ngai lo khawpa district rinawm leh rintlak ni turin tan la thar theuh turin a sawm a ni.

District hma sawn leh entawn tlak a nih theihna turin sawrkar lama a fawng vuantute an pawimawh em em a, an hmazawn theuhah theihtawp chhuah se a duh thu a sawi. Thawhhona a pawimawh hle a ti a, department hotute chu an hnuaia thawkte nen inngaihsak tawna, in ngai pawimawh tawn thin tur leh inzahtawn taka hna thawkho thin turin a duh a, chu chuan hmasawnna a thlen ngei a rin thu a tarlang a ni. Bialtu MLA Pu Jeje Lalpekhlua chuan kalkhawmte chu inthlahrung lova an mamawh apiang thlen thin turin a chah a, thil tha, hmasawnna thlen tur a nih chuan tlanchhe lovin theihtawp a chhuah thin dawn tih a tarlang bawk.

Vawiin kalkhawmte chu Hnahthial district hmasawna tura sawrkar kut leh ke an ni tiin ram leh hnam hmasawnna tura an ngaihtuahna te seng a, theihtawp chhuah a, an tha leh zung Ieh theihna te seng thar theuh turin a sawm a ni.