4292/2025-2026 

Dated Siaha, February 4, 2026 : Vawiin chawhma dar 11:00AM khan DRDO Conference Hall, DC Complex, Siahaah Road Safety Month hawnna hun hman a ni a, Additional DC Pu Abraham Beirazi Khithie chuan khuallian niin a hmanpui. Kumin Road Safety Month thupui hi Sadak Suraksha - Jeevan Raksha (Road Safety – Life Safety) tih a ni.

Thu sawiin Pu Abraham Beirazi Khithie chuan Ministry of Road Transport & Highways, Government of India annual report-a tarlan anih danin India ram chhungah darkar 1 chhungin lirthei chesualna vawi 53 thleng ziah ang a ni a, heng zinga za zela 72 chu tlan chak vang leh fimkhur tawk loh vang a ni a, kum khat chhungin mi nuai hnih chuangin lirtheia chetsualna avangin nunna an chan thin a ni, a ti.

Khuallian chuan Road safety awareness chu a kar emaw a thla emaw a hman maiah duhtawk lovin kumtluana ngaih pawimawh tha a tih thu sawiin, himna kawnga kan hriat ang angte kan tu leh fa leh thiante hnenah a zau thei ang ber sawi darh turin kal khawmte a chah a. Kawngpuia mipuite himna hi lirthei khalhtute chauh mawhphurhna a ni lo va, kea kal thinte leh naupang kawng kan ngaite nen kan zavaia tanrual ngai a tih thu khuallian hian a sawi bawk.

Kawngpuia chhiatna a thlen hian mihring mai bakah lirtheiin a tuar a, a chhe siamna leh damlo inenkawlna man pawisa tam tak sen a ngai a, sum leh pai dinhmun pawhin a tuar a. Chuvangin lirthei khalhtute’n lirthei khalh phalna neih dawna tih tur leh tih loh tur endikna an paltlang chu damchhunga zawm chhunzawm tur leh hawihawmna leh dawhtheihna nei turin a chah. Chetsualna thlenga a tuartute hi thalai an ni tlangpui a, an tha leh zung chhungkaw tan tangkai taka hmanga sum thawkchhuak rual an ni a, chetsualna an tawh hian ram sum leh pai a nghawng phak avang hian chhung tinte kan fimkhur lehzual a ngai a ni, a ti bawk.

Siaha Additional SP Pu Beimosia Lapi leh DTO office Siaha a Motor Vehicle Inspector Pu Vanlalrema te’n thu an sawi bawk.

Vawiin hun hmannaah hian Mizoram sawrkar department official, MADC official, Assam rifles, tlawmngai pawl, leh driver association aiawh an tel a, Dr. Manesia Khaimeichho, DTO, Siaha chuan Road safety Month hi February 2-ah hmang tura tih a ni a, amaherawhchu February 2-ah hriattirna dawn anih chauh avangin remchan zawkna avangin vawiinah hman anih thu a sawi a, kal khawmte hnenah lawmthu sawina a nei a, hun hman tihtawp a ni.