4034/2023-2024

Dated Siaha 1st March 2024: Vawiin chawhma dar 11 khan Mizorama Kut lian leh ropui ber 'Chapchar Kut' chu District Play Ground, Siaha Vaihpi, ah ropui leh urhsun taka lawm a ni a. Pu Lalhmunsanga Hnamte, District Bawrhsap chuan 'Chapchar Kut' hi thlengin, Pu M. Laikaw, CEM, MADC chuan 'Kut Pa' niin a hmanpui.

Kut thlengtu Pu Lalhmunsanga Hnamte chuan 'Kut Pa' leh Siaha khawpui atanga Kut chhim tura lokal zawng zawngte 'Chapchar Kut'  chibai bukna a nei hmasa a. Kumin Chapchar Kut thupui atana thlan ' Zonun zemawi tlawmngaihna' chu a taka nunpui a hun tawh tak zet a ti a. Mizoramah hian hnam hrang hrangte awm mah i la, Chhinlung Chhuak- Chhulkhat chhuak kan nihna hi hriat reng a pawimawh hle tiin Pu Lalhmunsanga Hnamte chuan chibil inthliarna awm lo a, lungrual leh in hmangaih taka Kut lawm a pawimawh hle a ni, a ti. Mizoram hi ram nuam leh chhenfakawm zawka siam turin a chhunga chengte kan pawimawh ber a, unau kan nihna hre rengin, in hmangaihna leh in lungrualna nen Kut hlim awm tak i hmang ho ang u tiin mipuite a sawm a ni.

'Kut Pa ' Pu M. Laikaw, CEM MADC, chuan 'Chapchar Kut' hmang tura lokal zawng zawngte chibai bukin, a bik takin 'Kut Pa' ni tura Chapchar Kut Organizing Committee- ten duhsakna an hlan avangin lawmthu a sawi a. Mizoram khawpui Aizawl leh District- danga 'Chapchar Kut' hmangtu  zawng zawngte duhsakna chibai a buk tih sawiin, Siahaah ngei pawh hian hlim leh nuam takin i hmang ang u tiin a sawm a ni. Pu M. Laikaw chuan Pi leh puten 'Chapchar Kut' chu Lo vah zawh, hal hma siin an hmang thin a, Pi leh puten urhsun takin an hmang thin tih hria ila, keini pawh hian 'Chapchar Kut' kan hman lai hian Pi leh pute nun a entlawntlak tam tak awm kha i hre thar leh ang u a ti. Pi leh pute nun a pawimawh tak - tlawmngaihna, thawhrimna leh intodelh- te hian kan tun dinhmunah hmun an chang tam tawhlo hle a, he zonun zemawi tak hi kaihthoh thar leh a hun tawh takzet a ni a ti.

Kut Pa chuan tundinhmunah kan ram chu sal chi hrang hrang- political sal, retheihna sal ah kan tan mek a. He sal atanga chhuak tur hian mitinin mawhphruhna kan nei a, thawhrimna leh taihmakna nen hmalam thlir chung zela ke pen turin tan i la thar zel ang u a ti . Eng hnam pawh mahni hnam nihna, tihdan phung, hnam zia rang ngainep zawng a ke pen thinte chu an hnam a boral zel tih tarlangin, Pu M. Laikaw chuan mahni hnam ziarang chawisang turin tan lak thar a tul hle a ti a. Mizoramah hnam peng chi hrang hrang kan awm a, in lak hran tumna hian rah tha a chhuah ngai dawn lo ani tiin, unau kan nihna vawng nung zel a, hmalam kan pan chuan hnam leh ram chak tak kan ni dawn a ni, a ti. Siahaah ngei pawh hnam chi peng tam tak kan awm a, heng hnam peng hrang hrangte hian inlungrualna leh inhmangaihna zir thar a, rilru leh ngaihtuahna siamfel a, inngaih taka kan chenho zel tul a ti. Mizorama Kut lian leh ropui tak kan hman mek lai hian inunauna leh inhmangaihna vawngthar zel ila, hlim leh nuam takin he 'Chapchar Kut' hi i hmang tlang ang u tiin kalkhawmte leh Siaha mipuite a sawm a ni.

Vawiin 'Chapchar Kut' hmannaah hian Pu Thanhseia (MUP) chuan Hlado chhamna neiin Joint YMA zawipawl ten Kut hawn hla an sa a. MHIP, MCHP leh LWA- ten hnam inchei entirna an nei a, School- naupangten Pawnto entirin, Joint YMA- ten 'Miruang zawn inchuh' entirna an nei bawk . Mimal leh Group- zai hrang hrang bakah hnam lam chi hrang hrangte entir ni bawkin mipui nawlpui tan Chai Lam leh Chhawnghnawh buatsaih a ni bawk.

Vawiin 'Chapchar Kut' ah hian 'Miss Chapchar Kut' , 'Mister Chapchar Kut' thlan niin naupang kum 10 hnuailam leh puitling tan hnam inthuam mawi leh inhmeh ber thlan nghal a ni a. Lawmman dawngtute chu