4035/2023-2024

Dated Aizawl, the 1st March, 2024: Vawiin khan AR Ground-ah Chapchar Kut, 2024 lawmna ropui tak buatsaih a ni a. Pu Lalduhoma, Chief Minister chu Kut Pa a ni a, Pu C. Lalsawivunga, Art & Culture Minister chu kut thlengtu a ni.

Thusawiin Kut Pa chuan, khawvel hmun tinrenga awm zofa zawng zawngte Kut chibai a buk a. Chapchar Kut chu hlim hun, zai leh lama hman thin hunpui a nih angin hlim taka hun hmang theuh turin duhsakna a hlan. Kan pi leh pute khan mahni hun theuhvah hun harsa tam tak an paltlang a, indo an ching a, tam a tla fova, hripuite a leng a. A hmachhawn turin ramthuam tha an nei lova, daktawr an nei lova, ram pawn atanga chaw an chawkluh thu kan hre ngai lo. Nimahsela, "Dam leh tlang khatah, thih leh ruam khatah" tiin hun harsa an hmachhawn a, tampuimitthi an tawhin "Sem sem dam dam, eibil thi thi" tiin an inpeizawn leh a. Nun ze mawi taka nungin khawtlang an inkhaichhuak thin. Chu nunzia chu ram leh hnam din nana ralthuam tha ber a ni a, vawiin thlengin a la ni reng a ni, a ti. Chuvang chuan kan zonun ze mawi te kha chawi nung thar leh ila, kan nunphung tha lo, vawiina dinhmun tha lo taka kan khawtlang nun min siamtute hi i kalsan ang u, tiin Zofate a sawm a. Ram leh hnam tluchhe mek hrethiama, thahnemngai taka siam that tuma beitu mi sang tam tak an awm tih tarlangin, chung mite hnenah chuan " nghet takin lo ding ula, lo zam lo ula, lo beidawng reng reng suh u. Kawng dik zawh turin kan pal hi a tliak lo a nih vaih chuan kan Ngal zawk tal a tliak ang tiin, tlak huamin thil tha tih kan ngam a ni" a ti.

Kut Pa hian Mizorama raltlan awm mek te hnenah, "khawvel huapa kan chhuan, ram ralmuangah in rawn lut a, hetianga ralmuanga kan awm theihna chhan chu kan khawtlang inenkawlna leh kan ram dan te vang an ni a. Heng kan dan te hi tha takin lo zawm ve ang che u. Dan bawhchhetute chungah ngaihhnathiamna a awm thei lo" tia hrilhin, thlamuang taka awm turin a chah a ni.

(Chief Minister thusawi hi dirp.mizoram.gov.in ah chhiar theiha dah a ni)

Kut thlengtu hi Pu C. Lalsawivunga, Minister, Art & Culture a ni a. Kut thlengtu hian hlim taka kut hmang turin kalkhawmte a sawm a, tha taka mawhphurhna hlen tute chungah lawmthu a sawi a ni.

Hun khatna hunserh hi Pastor Biakzidinga, President, 7th Day Adventist Mizo Conference in a hmang a, Pu Lalhmachhuana, President Central YMA chuan inlawmna thu a sawi a. Zai, lam, Sakei lu aih leh lengkhawm zaite entir zui a nih hnuah hun khatna bik hi Pi Carol VLMS Dawngkimi, Director, Art & Culture chuan lawmthu sawiin a khar a ni.

Chapchar Kut hmang tur hian state dang atangin mi engemawzat an rawn kal a. Kut chhimtute zingah hian Pu Bhausuan Ger, Taiwan ram palai leh a nupui Pi Hui Chen Chen te pawh an tel a ni.