4036/2023-2024

Khawzawl, 2nd March 2024: Nimin tlai khan Tuichang bialtu MLA Pu W. Chhuanawma, Dy Government Chief Whip chuan Khawzawl Tourist Lodge, 2nd IR Battalion leh NH-06 (Old Road, Tuisenphai to Chhumliam kawn) te a tlawh a. He hunah hian sawrkar official te nen hmalakna tur hrang hrang an sawi ho.

Khawzawl Tourist Lodge, Khawzawl Lungvar Venga mi chu a nihna tur ang taka hman thuai a nih theih nan hmalak tul nia a hriat thu Pu W. Chhuanawma hian a sawi a. National Highway - 06 (Tuisenphai - Chhumliamkawn) a kawng chhe zual lai - Kawnzar Bung kual, Chhipchhuan Bazar Junction, Vengthar Bazar leitlahniam leh Forest Complex kual te sawrkar official, NHIDCL leh Balaji Company te nen an en ho a, siam that vat a nih theih nan chak taka hmalak dan tur an sawi ho bawk a ni.

2nd Indian Reserve Battalion Headquarters Khawzawl Lungvar a tlawhnaah thu sawiin Pu W. Chhuanawma chuan 2nd IR te hnathawh chu fakawm a tih thu a sawi a. Sawrkar hnathawkte chu zalenna zau tak pek an duh thu pawh sawiin, sawrkar policy kaihhnawih a nih loh chuan nitin inrelbawlna (day to day administration) ah chuan sawrkar hnathawkte an rintawk a, thuk taka inrawlh an tum lo a ni, a ti. Pu W. Chhuanawma hian he hunah hian Khawzawl 2nd IR kawng, vantlang kawng laih zauh avanga min belh mai theia awm chu lungrem hmanga chhan dan tur a en pui nghal a ni.

He hunah hian 2nd IR Commandant Pu Saidingliana  Sailo chuan Battalion dinhmun leh mamawh tlangpui te a sawi a. Khawzawl DC Pu K. Lalrohlua pawhin thu a sawi ve bawk. Pu W. Chhuanawma hian vawiin chawhnu hian Khawzawl chhuahsanin Aizawl a pan ang.