3857/2024-2025

Siaha, 17th January, 2025: Vawiin khan Nehru Yuva Kendra, Siaha buatsaihin Road Safety Volunteers Orientation Training Programme chu MADC Forest Conference Hall-ah hman a ni. Road Safety Awareness Campaign hi ni 17-23 January, 2025 chhunga hman tur niin Pu S. Vabeihasa, Sports & Youth Officer, MADC chuan Khuallian niin hun a hmanpui.

N. Rosaline, i/c MTS, NYK, Siaha chuan hun a kaihruai a, NT. Lalchhanhimi, i/c Art & Culture MTP Branch, Thosai chuan hunserh a hmang. Hun kaihruaitu N. Rosaline chuan Siaha District chhung khaw hrang hrang atanga training nei tur thalai mi 27 te inhmelhriattirna leh inlawmna thu a sawi.

Khuallian Pu S. Vabeihasa, Sports & Youth Officer, MADC chuan thu sawiin engkimah a tak ram thleng tur chuan Training neih tam a tul a ti. Siaha khawpuia traffic lam harsatna tamtak chu traffic rules hriatchian tawk loh vang a ni thin tih sawiin khuallian chuan vawiina thalai inpe tak takte chu mipui harsatna tam tam chhawk zangkhaitu ni tur leh he training kaltlang hian hmantlak tak tak ni turin duhsakna a hlan nghal. Training chhuakte a tul hunah traffic police-in anmahni tanpui tura an hmang thei tur chu lawmawm a tih thu khuallian hian sawiin mi inpe leh a nachang hria an lo chhuah zel a beisei thu a sawi bawk.

Pu A. Lalthianghlima, ASI, In-charge Traffic Branch, Siaha chuan zirtirna pein zawhna leh chhanna hun hman a ni bawk. Zirtirna petu chuan Government Siaha College a zirlai zingah Warden tam tak awmin traffic police lamin an mamawh hun apiangah warden-te hian Lirthei leh mipui him nan a duty thin thu a sawi bawk. Training chhuakte hian certificate an dawng vek a. MADC Forest Conference Hall-a hun hman zawh hian MADC office, Council Vaih atanga Vaihpi Traffic point thleng thalai Volunteer-te hian Banner kengin kawng an zawh nghal a ni.