Mizoram kaihruai tura Chief Minister nihna rawn chang lehtu, Pu Lal Thanhawla chu nimin khan Sialsuk khua-in lawmpuina neiin ruai nen ropui takin an chawimawi. Chief Minister te nupa hi pangparthi te lo awrh tirin, MUP member ten khuallam leh hlado nen an lo hmuak bawk a. Pu Hawla hi thangchhuah diar khim tirin; a nupui Pi Lalriliani chu thangchhuah puan an bah tir bawk a. An nupa hian Sialsuk mipui ten an lo hmuahna gate atanga chawimawina inkhawm neihna hmun ‘YMA Inpui’ thleng an zawn a ni.

 

 

 

 

Chief Minister chuan Sialsuk khuain amah leh a nupui chawimawina ropui an siam chu lawmawm atih rualin hetiang chawimawina chu an phu lo hle a a hriat thu a sawi a. Sialsuk khaw mipui ten Mizorama khua 813 zinga hmasawnlo ber khua ni anga inngaihna an nei chu Pu Lal Thanhawla chuan a sorkarin tumah, a mimal angin emaw, pawl angin emaw, khua angin emaw siam bik a tum lo ni tiin, rualkhai thei ang bera hmasawnna hna kenkawh a ni ang a ti a. An mamawh zualpuite chu  enzui a nih tur thu a sawi bawk a ni. Sialsuk mipuite chu an dinhmun theuh inbihchiang tura chahin an thil tih reng reng Pathian lam tang a ni em tihah an chiang tur a ni a ti a. Mizo te chu sum ngaina hnam kan nih avangin kut tlinglo pawha sum lak hrehlo vek kan ni a, mahni theuh kan insiam that a tul a ni a ti. Siam that hna thawk tur hian hruiatu tha, fel leh dik kan mamawh a, chutih rualin mipui tha, fel leh dik kan mamawh ve bawk a ni a ti.

Chief Minister hi thuziak, citation an hlan bawk a ni.

Bialtu MLA, Parliamentary Secretary Pu K.S.Thanga pawhin thusawiin, he ni hi Sialsuk tan hmasawnna lama ke a penna tura bul tanna, ni thar a ni a ti.

Chawimawina inkhawm kaihruaitu Pu C. Thanzawna, VCP chuan Pu Lal Thanhawla an chawimawina chhan chu hruaitu ropui Chief Minister rawn nih thei leh miretheite chhanchhuaktu tur anih vang a ni a ti.

Chief Minister chawimawina ah hian a khawnawtin ruai an theh a ni. Chief Minister hi Pu Lalrinliana Sailo, Health Minister leh Parliamentary Secretaries leh MLA ten an tawiawm a ni.