Agriculture Department chuan ni 19 leh ni 20 August khan Sialsuk leh Aibawk-ah an enkawlna hnuaia NLUP 3rd Phase leh 4th Phase dawng tute hnenah tanpuina an sem a, He hun, District Agriculture Office, Aizawl District buatsaihah hian Khuallian Pu KS Thanga, Parliamentary Secretary chuan chhungkaw 246 hnenah Rs.1,02,82,000.00 a pe chhuak a ni.

Pu KS Thanga, Parliamentary Secretary chuan NLUP dawngtu kalkhawmte hnenah fuihna thu sawiin “Sawrkarin eizawnna ngelnghet nei lote khaichhuah nan NLUP hi a siam a, he hun tha hi bawhpelh a thiang lova, NLUP hlawhtlinna chu a dawng tute kutah a in nghat a ni” a ti. 1st Phase leh 2nd Phase tanpuina pawisa dawngtute zingah hlawhchham leh hlawhtling an awm a, chu chu tuna NLUP dawng tute hian darthlalanga hmeng tur leh NLUP hlawhtlin pui tute kawng zawh turin Parliamentary Secretary chuan a fuih a ni.

NLUP 3rd Phase leh 4th Phase dawng tute hnenah hian 2nd Instalment atan WRC-I ah Rs.45,000/-, WRC-II ah Rs.44,000/-, Oil Palm ah Rs.40,000/- leh Sugarcane ah Rs.32,000/- theuh pek a ni.

Aizawl South-III bialtu MLA leh Parliamentary Secretary ni bawk Pu K.S Thanga chuan August ni 20 khan Sailam ram chhunga Upper Lau leilet hmun Agriculture Department in NFSM leh PKVY Scheme hnuaia an hmalakna te a hmunah a enpui a, Agriculture Department kaihhruaina hnuaia loneitu te hmalakna chu fakawm a tih thu a sawi. Agriculture Department hotute chuan helai hmunah hian New Economic Development Policy (NEDP) hnuaia Purunsen chinna tura hmalak tum a nih thu an sawi bawk.