NLUP hnuaia Bawng sem thawhkhatna (March-May 2012) chhung khan bawng kena hri avangin beneficiary-te’n an bawng an chan nual a. September ni 30, 2012 thlenga Bawng kena hri leh a kaihhnawih avang leh hrileng eng eng emaw avanga bawng chan ta te chu sorkarin a thlakna pek leh ni se a tih angin vawiin khan Sihphir-a beneficiary 13 te chuan NLUP hnuaiah bawng 16 an dawng leh a ni. He bawng pek nawn programme-ah hian AH&Vety. Minister Pu Nihar Kanti Chakma leh Bialtu MLA Pu R. Lalrinawma ten beneficiary te hnenah an bawng dawng tur an sem a. Bawng pakhat chan chuan pakhat a dawng leh a, bawng pahnih chan te chuan pahnih an dawng leh a ni.

NLUP Bawng pek nawn inkhawm AH&Vety. Director Dr.L.B.Sailo kaihhruaiah Minister Pu N.K. Chakma chuan nikum ah bawngvulh thlangtu ten vanduaina an tawh chu pawi a tih hle thu leh vawiinah sorkarin an tan vanneihna thar a ruahman sak leh thei chu lawmawm hle a ni, a ti. Ran vulhtute chu AH&Vety. Department te nen inkungkaihna leh thawhhona tha tak an nei hi a pawimawh tak zet a ni tiin Pu N.K. Chakma chuan ran vulh lamah harsatna eng eng emaw an tawh pawhin sorkar dem mai lovin Department hotute rawn chunga tanlak dan tur sawiho hi a tha zawk a ni, a ti. State pawn atanga bawng lei leh Mizorama lakluh a harsatzia sawifiahin Minister chuan AH&Vety. officers te chu bawng lei tura an fehchhuahnaah bawng talh tur lei tuma puhin lock-up ah hial an tan phah thin a ni, a ti. Sorkarin mipuite hamthatna tur ngai pawimawhin theihtawp a chhuah lai hian NLUP leh scheme hrang hrang hnuaia tanpuina dawng reng rengte chuan rinawmna, dikna leh taimakna nena an thawh ve hi an bat ve a ni, a ti.

A sawizelnaah AH&Vety Minister chuan Mizo ranvulhtuten an inthlahdah thinna ber chu a hun taka vaccine lak chungchang a ni tih sawiin Department lamin vaccine lak hun tur an hriattir tawh pawha kal tha duh lo, ranah vanduai leh thin si, an mangan tawpah sorkar dem leh ringawt ching an awm thin hi a dik lo a ni, a ti. Ranvulhtute tan scheme hrang hrang leh insurance awmte chu ngaihven a, department mithiamte rawn fo turin a chah a. NLUP hnuaiah bawng vulh thlang thahnem tak an awm avangin hun reiloteah Mizoram chu bawnghnute-ah a intodelh thei ngei a beisei thu Minister chuan a sawi bawk a ni.

Bialtu MLA leh Chairman, Mizoram Law Commission Pu R.Lalrinawma pawhin thu sawiin NLUP sem kawnga he bial chhunga beneficiary-te chu sorkar duhsaknain tanpuina dawng hmasa pawl-ah an tan thin avangin lawmthu a sawi a. NLUP hmasaah pawh he Bial chhunga beneficary engemawzat chu eizawnna ngelnghet tak an nei hman a, tuna NLUP dawng mek te pawhin chu chu entawna theihtawp chhuah turin vawiina bawng dawngte leh he biala NLUP beneficiary zawng zawngte a chah bawk a ni.

AH&Vety. Director Dr.L.B. Sailo chuan nikuma bawng chah chhuah engemawzat an chan khan zawhna leh sawiselna tam tak department chuan a dawn thu a sawi a. “Vawiina bawng thi avanga mangang tak tak te hi nakinah chuan an la nui dawn a ni” tiin a chhan thin chu vawiinah hian a thleng dik tan a, bawng thi aia a dang dawng leh thei beneficiary zawng zawng te lawmpuina leh duhsakna a hlan bawk a ni.

AH&Veterinary Department chuan NLUP hnuaiah Bawnglian vulh thlangtute tan Punjab leh Haryana State atangin bawng tha chi engemaw zat a la lut mek a. Tun dinhmuna bawng lakluh dan chu a tlangpuiin hetiang hi a ni :

1. Bawng lakluh zawng zawng = 2038

2. Kawng laka rawn thang mek = 90

3. Kalkawnga thi zat = 44

4. Quarantine Shed-a thi zat = 81

Bawng sem tawh zawng zawng chu hetiang hi a ni :

1. Aizawl District Chhungkua 303x2 = 606

2. Mamit District Chhungkua 61x2 = 122

3. Kolasib District Chhungkua 124x2 = 248

4. Champhai District Chhungkua 111x2 = 222

5. Serchhip District Chhungkua 162x2 = 324

6. Lunglei District Chhungkua 93x2 = 186

7. Lawngtlai District Chhungkua 66x2 = 132

8. Saiha District Chhungkua 11x2 = 22

TOTAL = 1862

NLUP Bawng sem hmasaa bawng chanta a thlakna pek tur zat chu :

1. Aizawl District-ah = 101 nos.

2. Kolasib District-ah = 53 nos.

Total = 154

NLUP beneficiary tupawh Bawng kena hri avanga bawng chan ta chhungkua zawng zawngte chu hetiang hian bawng pek leh vek tum a ni a. Sorkar leh Department hriatpuina ni lo a Bawng hralh emaw tiral emawte erawh chu bawng pek nawn an ni lo ang.