Chief Minister Pu Lal Thanhawla chuan vawiin khan a office conference room-ah Lt.Col (Rtd) Z.S.Zuala chu rinawmna thu tiam tirin Parliamentary Secretary atan a la lut. Hemi hnu hian State Planning Board Member Secretary atan Pu Haukhum Hauzel, IAS (Rtd) pawh rinawmna thu tiam tirin a lalut bawk. Parliamentary Secretary thar hi hna chanpual tur pek nghal a nilo.

Lt.Col Zosangzuala (Z.S.Zuala) hi Phulpui khuaah ni 1.1.1943 khan alo piang a. Zirna lamah chuan Intermediate Arts (I.A.) a ni. Tunah hian a nupui Rosangliani leh a fapa Zosangliana leh a fanu Pinky Zosangpuii te nen Mission Veng South ah an cheng mek a ni.

Lt.Col.Z.S. Zuala hi miretheite chawikan duh mi leh khawtlanga inthununna lekkawh duh mi a ni a. Mission Veng VDP President lo ni tawh, term 2 chhung VC member lo ni tawh bawk leh YMA Sr.Adviser te lo ni tawh thin a ni. Ramngaw pilrila kal vel leh chen nuam ti mi a ni bawk. Kum 2008 inthlanpui ah khan Indian National Congress ticketin Aizawl South II MLA a thlan tlin a ni.

Pu Haukhum Hauzel hi Pu Singkhama leh Pi Nemvungi te fapa, Hnahlan khuaah ni 1 March 1951 khan alo piang a. Kum 1959 Mautam tam hreawm kalsanin Lamka, Manipurah an chhungkuain an pem a, Lamka hi seilenna khuaah a hmang ta a ni. Kum 1967-68 khan Matric 1st Division ah passed in, Gauhati University atangin Distinctionah a graduate leh a ni.

A graduate kum vek hian a tum khat exam beihnaah IAS tling nghalin, ni 14 July 1974 khan a hna hi a zawm nghal a. Delhi Administrationah SDM/SDO leh ADM hna te a chelh a. Tichuan Goa ah transfer niin, Collector/DM of Daman hnate a chelh a, Union Territory of Dadra and Nagar Haveli a Collector ah sawn leh a ni. Kum 1985 khan Mizoramah rawn sawn chhoin, dapartment hrang hranga Secretary/Commissioner hna te a thawk a ni. Delhi ah kum 1989 khan sawn thlak leh a ni a. Kum 1995 khan Mizoram sorkarah bawk lokir lehin Development Commissioner / Principal Secretary hna te chelhin, kum 2005 a Chief Secretary a a kaisan thleng khan heng hna te hi a thawk a ni. Kum 2009 tir lam khan Government of Capital Region of New Delhi a Financial Commissioner hna chelh tura sawn thlak a ni a. Hemi kum vek hian Goa Chief Secretary ni turin Home Ministryin a sawn leh a. Hemi hnu hian Delhi ah bawk la let lehin a pension superannuation ni 28th February 2011 thleng a thawk a ni.

Parliamentary Secretary leh Planning Board Member Secretary thar lakluhna hi Chief Secretary Pi L.Tochhawng in a kaihruai a. Sorkar hotu lian te an tel tha hle a ni.