Kum 2013-2014 session atan Ministry of Information & Broadcasting hnuaia Indian Institute of Mass Communication (IIMC), India ram a Mass Communication zirna in din hmasak leh changtlung ber tia chhal ngam chuan courses hrang hrang zir duhte tan All India Level Entrance Exam chu Ni 26, May 2013 hian India rama Exam Centre hrang hrangah a buatsaih leh dawn a. Aizawl-ah pawh DIPR Conference Hall-ah Exam hi buatsaih a ni ang. Exam pe duhte tan www.iimc.gov.in ah information kimchang pek anih bakah chanchinbu lamah pawh hriattirna hi chhuah a ni.
Mass Communication/Media lama tui mite leh eizawnna atana hmang duhte tan chuan IIMC a zir hi thil tih chi tak a ni awm e. Sorkar leh mimal enkawl Media Industries-a technology an hman mil tur ang zelin theory leh practical zirna lamah he Institution hi a inher rem zel a. Chuvang chuan zirlaite’n hna an han thawh hian harsatna an nei ngai lo a ni.
Media Industry-te hian than lam an pan zel a, thawktu mamawhna pawh a pung zel a. Entirna pakhatah chuan tunlai hian Ministry of Information & Broadcasting hnuaia autonomous body – Prasar Bharati (Doordarshan leh All India Radio) a thawk tur Programme Executive, Producton Assistant leh a dang hna 806 lai mai dil theih a ni mek a. Heng hna dil tur hian Mass Communication Degree nei nih a pawimawh takzet a. Hetiang lama eizawn duh tan chuan Mass Communication subject lak/zir hi a tih chi hle awm e.
