Vawiin chawhma khan Horticulture Department chuan Sihphir khua a Iskut(Chayote) chingtu chhungkaw 442 hnenah Rs 21,98,025/- man leitha chi hrang hrang te quintal 1625 a sem a. He hun hi Deputy Speaker of Mizoram Legislative Assembly Pu R. Lalrinawma, bialtu MLA ni bawk chuan hmanpui. Kuthnathawktute hnena leitha semna pual a programme tawi Sihphir Kawn veng a twin market hmun ah buatsaih niin Horticulture Department hotute leh Mizoram Iskut Growers' Association hruaituten an kaihruai a ni.

Deputy Speaker Pu R.Lalrinawma chuan Iskut thlai chu Mizoram in state pawn atanga sum kan lakluh ve theihna kawng tlemte zinga chhuanawm tak a ni a. Sawrkarin Iskut chingtute taihmakna leh hlawntlinna te hi a hriatpui mai ni lovin a chhuang em em a, chak zawka hma an lakzel theihna tur leh Iskut rah hralh tur tam zawk an thar zelna turin hma a lakpui zel dawn a ni a ti a. Kuthnathawh hi kan sawimawi zel a ngai mai nilovin kuthnathawktute ngaihsan pawh kan intihhmuh chhoh a ngai a. Chu chu kan ngaihsan hnam changkang zawkte rilru put hmang a ni a, mi kan an ve na tur leh kan intodelhna tur kawng awmchhun a ni ti. Sawrkar tanpuina dawngtute chuan tihtur an nei ve a, chu chu intodelh tura hmalak leh sawrkar puihna mamawh zel tawh lova dinchhuah ve tum hi a ni a. Sawrkar puihna englai mai pawh a phut reng mi chuan hmasawnna leh hlawkna a hmu thei thin lo a ni tiin Iskut chingtute chu nasa zawka an thlai hmanga sum thawk chhuak turin a fuih a. An thlai hralhna atanga sum hmuh 20% tal chu leitha leina atan te, huan thlawhfaina atan leh Iskut huan enkawlna atana mamawh dangte phuhruk nan khawl that zel a tangkai hle a rin thu Iskut chingtute chu a hrilh a ni.

Sihphir a Iskut huan neitute hnena leitha chi hrang hrang semchhuah tak te chu UREA 200qtls, SSP 400qts, MOP 150qts, Neem Manures 250qts leh Slaked lime 625qts a ni. Heng leitha chi hrang hrang te chawhpawlh dantur leh bawngek leitha te nena pawlh dan turte chu Pu Lalliankima, Joint Director, Horticulture Department leh a thawhpui ten an an sawi fiah nghal a ni.

Kum 2013 chhung khan Sihphir khua hian an ram 251Ha. a zau chu Iskut chin nan hmangin Iskut bul 33,155/- atanga an seng Iskut rah quintal 45,742/- chu sum ah chantir in Iskut man ringawt Rs. 261,55,332/- lai an hmu a ni. Heng an Iskut thar te hi wholesale rate ah Kg 1 zel chu Rs.5 leh Rs.6 inkara zuar in an in chhut a ni.

NLUP 1st phase atanga 4th phase thlenga NLUP hnuaiah chungkaw 208, NLUP tanpuina dawngtute Sihphir khaw ram chhungah hian an awm mek bawk a ni.