Vawiin khan Lawngtlai District Disaster Management Committee hnuaia Team Of Officers, SDO Sadar Pu C. Lalsangluaia kaihhruai te chuan Lawngtlai khawchhunga leilung chhiatna thlen hlauhawmna hmun hrang hrang te an tlawh a, hma lak dan tur a hmunah an enfiah.

Vawiin a Team Of Officers kal te hian Lawngtlai III a lei tlahniam, YLA Salem Branch te ram laih leh Bazar area a lei tlahniam te an tlawh a. Bazar area a lei tlahniam Pi Ziki tuikhur lui leh Hrangthiauva tuikhur lui inkar mual ah hian Lei dawlna lian tham (Check Dam) pathum siamna tura dilna District Disaster Management Committee ah thlen nise an ti a, chutiang bawkin Lawngtlai III lei tlahniam national highway 54 paltlang laiah pawh hian Check Dam thar pahnih a thlang lui kama siam nise an ti bawk a, Salem Branch YLA Hall laihna erawh hi chu kum tawp lamah Hall sak tan theih an in beisei avangin leimin venna tur Silpaulin pali (4) pek rih mai nise an ti bawk.

Team Of Officers te hi Central YLA, Vengchhung YLA branch leh VC ten an tawiawm a ni.