Sihphir Branch YMA ten an khaw zirlai exam pass thar te chawimawina leh career guidance programme an huaihawt chu vawiin chawhma dar 10:00-a Community Hall, Sihphir Tlangvenga neih chu Deputy Speaker Pu R.Lalrinawma’n a hmanpui.

Lawmpuina thu sawiin Deputy Speaker chuan khawtlang hmasawnna ngaihtuahtu YMA Branch ten zirlai examnaa hlawhtling te chawimawina chang  an hria chu lawmawm tiin zirlai te pawhin an hlawkpui ngei a beisei thu a tarlang a. Aizawl khawpui thlaia chawmtu Sihphir khua chu taima khua ni chhunzawm zel turin tan la thar turin kalkhawmte chu a fuih bawk. Vawiina chawimawi te zinga Forestry leh Geology master degree nei mithiam an tel chu lawmawm tiin ram leilung leh boruak humhalh leh enkawl kawngah fimkhur taka kalpui a pawimawhna te a tarlang bawk. Tumruhna leh taihmankna nen hlawhtlinna a chan theih a ni tih hriaa zirlai te chu goal sang zawk thlen tuma tan la zel turin a chah a, Mizoram ah hna-in min daih loh avangin ram pawna thawk thei tura inbuatsaih theuh turin a ngen bawk. Tunlai khawvel chu inelna khawvel a nih hriaa, chhel taka hrehawm tuara rim taka zir thin turin a fuih a, Sihphir leh Mizoram tana mi tangkai ni tura zir theuh turin a chah bawk. Law Commission Chairman a nih laia an lo buaipui tawh Mizo hmeichhe dinhmun chawikan nana Mizo Inneih, Inthen leh Rokhawm Dan Mizoram Legislative Assembly-in a passed ta chu lawmawm a tih thu te Pu R.Lalrinawma chuan a sawi lang bawk.

Zirlai pass tharte chawimawina leh career guidance programme hi Sihphir YMA Education Cell Chairman Pu C.Chhuanawma’n a kaihruai a, HSLC passed 55, HSSLC - 37 leh graduate & post graduate - 7 te zingah hian Lalnunhlua, HSSLC Science, Mizoram puma 9-na te, Lalengzuali M.Sc. Geology, MZU leh Michael Lalmalsawma M.Sc. Forestry, NERIST, Nirjuli, Arunachal Pradesh te an tel a ni. Mizorama hmawng thing zirchianna Michael Lalmalsawma thesis ziah hi International Journal of Botany & Research ah chhuah a ni nghe nghe a ni.