Vawiin chhun khan Mizoram Information Commission leh Sihphir Venghlun Youth Club tangkawp chuan Sihphir Community Hall-ah RTI Awareness Campaign an buatsaih a. Hetah hian Chief Information Commissioner Pu Lal Dingliana, IFS (Rtd) chu khuallian a ni.

Khuallian chuan RTI hi lang tlang sawrkar, mawhphurhna la ngam leh dik neih nan leh corruption ven nan a tul, a ti a. RTI tobul leh a hman dan turte sawiin, khawvela ram changkang apiangte chuan Right to Information hi hun rei tak chhung an lo hmang tawh a ni, a ti. Pu Lal Dingliana chuan khawtlang hruaitu leh tlawmngai pawl aiawhte an tel thei chu lawmawm tiin zirlai naupangte hnenah fuihna thu a sawi bawk a ni.

Chief Information Commissioner Pu Lal Dingliana leh amah tawiawmtu Mizoram Information Commission Secretary Pu Vanlalngena leh officer dangten kalkhawmte chu zawhna leh chhanna hun an hmanpui nghal a ni.

Youth Club President Pu C. Vanlalawia chuan campaign a kaihruai a. Youth Club Secretary Pu Lalnunsanga’n report pe in, Club hmalak tawhna leh hmachhawp hrang hrangte a tarlang nghal a ni.

Campaign-ah hian zirlai naupang leh zirtirtute bakah khawtlang hruaitute leh tlawmngaipawl hrang hrang aiawhte an tel a ni.