Vawiin chawhma dar 10 khan Indian Council of Agricultural Research (ICAR), Kolasib buatsaihin “Brainstorming session on climate resilient technologies for livelihood improvement of farmers in Mizoram” chu Directorate of Agriculture Conference Hall-ah hman a ni a. Agriculture changtu Parliamentary Secretary Lt Col. (Rtd) Z.S. Zuala’n Khuallian niin a hmanpui.
Lt Col. (Rtd) Z. S. Zuala chuan thu sawiin, kan lei chunglang hang thahnem tak chu tlangram lo neih avangin a bo tawh a, plantation chi hrang hrang he’ng oil palm, rubber leh teak avang te pawh hian climate change a awm phah tih a tarlang a. Chu vang chuan hlawk zawka thlai kan thar theih nan chuan leitha thamral tur hi kan ven a ngai a ni, a ti. Tun hmaa May thlaa ruahthimpui ni 3 chhung sur thin pawh tun dinhmunah a danglam tawh thu a sawi bawk a ni.
Khual zahawm Agriculture Director (CH) Dr C. Lalzarliana pawhin thu sawiin, Mizoramah ngei pawh sik leh sa inthlak avangin crop protection thlenga a nghawng thu a sawi a. Tin, National Action Plan on Climate Change (NAPCC) hnuaia hma lakna hrang hrang an siam tawhte, selection of villages and beneficiary household project hnuaia an siam dante chu member kalte hnenah a tarlang bawk a ni.
ICAR Senior Scientist (Forestry) Dr K.P. Mahapatra chuan National Mission for Sustainable Himalayan Ecosystem tobul sawiin, Prime Minister Office atanga duan niin, sik leh sa inthlak danglam vanga Agriculture department lo inralrin a, zirchian a ngai, a ti. He project hlawhtlinna tur hian state sawrkar hnathawktute’n nasa taka tawiawmna kan mamawh a ni, a ti.
Hawnna inkhawm hi ICAR Joint Director Dr S.B. Singh chuan hawngin, facilitator-te hnenah thilpek a hlan a. Programme tihlawhtling tura department hrang hrang atanga kalte hnenah lawm thu a sawi.
He session-ah hian Mizoram hmun hrang hrang atangin Agriculture leh a kaihhnawih Head of Department leh officer thahnem tak leh Mizoram University atangin mi thiam 50 chuang an kal a. Session 1-na hi ICAR Scientist (Agricultural Physics) Dr Saurav Saha chuan lawm thu sawina a nei. Session 2-naah Technical session neih niin, ICAR mi thiamte leh department atanga mi thiam ten powerpoint presentation an nei a ni.
